Ռիո դե Ժանեյրոյում շարունակվում է հրաձգության օլիմպիական վարկանիշային միջազգային վերջին  մրցաշարը:

Հայաստանի պատվիրակներից դիպուկությամբ կրկին աչքի ընկավ մեր երկրից առաջինը Փարիզի օլիմպիական խաղերի ուղեգիր նվաճած Էլմիրա Կարապետյանը: Երևանցի մարզուհին  օդամղիչ ատրճանակով 10 մ. հեռավորությունից վաստակեց  240, 7 միավոր, գրավեց առաջին տեղը և երկրորդ անգամ հաստատեց խաղերում հանդես գալու իրավունքը:

Նույն մրցաձևի տղամարդկանց պայքարում մեր Բենիկ Խլղաթյանը զբաղեցրեց  15 –րդ հորիզոնականը:

Ի դեպ, խառը երկյակների մրցավեճում ուղեգիր կստանան նաև լավագույն քառյակում տեղ գտածները: Ավաղ, Էլմիրա Կարապետյան – Բենիկ Խլղաթյան զույգը մեկ քայլով ետ մնաց այդ հնարավորությունից, քանզի զբաղեցրեց հինգերորդ տեղը:

Էլմիրան իր ուժերը այսօր  կփորձի նաև 25 մ. կրակագծում, նպատակով, որ առաջիկա համաշխարհային գլխավոր մարզահանդեսին մասնակցելու իր  երկրորդ  արտոնագիրը ունենա, իսկ հրացանակիրների մրցավեճին կմասնակցի Հրաչ Բաբայանը: