Հայաստանի հունահռոմեական ըմբշամարտի հավաքականը լրջորեն է նախապատրաստվում  տարվա գլխավոր ստուգատեսներին: Առաջնայինը, իհարկե, Փարիզի օլիմպիական խաղերն են: Համաշխարհային այդ մարզահանդեսում մեր երկրի մարզական պատիվը կպաշտպանեն անվանի Արթուր Ալեքսանյանը, Մալխաս Ամոյանը և Սլավիկ Գալստյանը: Նրանք հավաքականի կազմում մասնակցեցին Ծաղկաձորում այսօր ավարտված ուսումամարզական հավաքին:

Գլխավոր մարզիչ Արմեն Բաբալարյանից տեղեկացանք, որ մարզումներից մեկի ընթացքին հետևել է Մոնրեալի օլիմպիական խաղերի չեմպիոն / 1976թ./ Սուրեն Նալբանդյանը: Հեռակապով  նա  կարծիք հայտնեց մեր տղաների պատրաստականության  մասին: Ասաց, որ գլխավոր մարզիչ Արմեն Բաբալարյանը կարողանում էր ուշադրությամբ հետևել մարզվողների գործողություններին: Լավ է, որ նա, ինչպես ասում են, պերիֆերիկ տեսողություն ունի  և նկատում է սաների սխալները: Ինչ վերաբերում է օլիմպիականներին, ապա շատ է հարգում Արթուր Ալեքսանյանին ու բարձր է  գնահատում  նրա   նվաճումները: Թե ինչպիսին կլինեն մեր ըմբիշների օլիմպիական գոտեմարտերը, առայժմ դժվար է ասել, որովհետև առջևում դեռ ժամանակ կա և եռյակը մրցումների ու մարզումների արգելքներ դեռևս պետք է հաղթահարի:

Նկարում. - Օլիմպիական խաղերի չեմպիոններ Սուրեն Նալբանդյանը և Արթուր Ալեքսանյանը:

Նախկին արմավիրցի Սուրեն Նալբանդյանը հաճախ է այցելում  հայրենիք, անպայման լինում է  իր մարզադպրոցում, որտեղ ծանոթացել է մարզաձևի հնարքներին: Նախկին ակումբակից, երևանցի Աշոտ Ավանեսյանի մոտ է հիմնականում հանգրվանում: Նրան ճանաչում է դեռևս պատանեկան հասակից, ու Աշոտի հետ է  ականատես եղել  թիմի ծաղկաձորյան մարզումներին:

Արմեն Բաբալարյանից տեղեկացանք, որ բացառությամբ Արթուր Ալեքսանյանի, հավաքականի կազմը կմասնակցի վաղը Երևանում մեկնարկելիք Բենուր Փաշայանի անվան  ավանդական հուշամրցաշարին: Այնուհետև,  հունիսի 8 – 18- ը,  առաջատարները հավաքի կմեկնեն Բուլղարիայի Վառնա: Մարզումները այնուհետև  կշարունակվեն Երևանում, արտերկրում,  ապա հայրենիքից կմեկնեն Փարիզ՝ օլիմպիական խաղեր: