Ալբանիայի Տիրանայում  շարունակվում է ծանրամարտի Եվրոպայի առաջնությունը:

Երեկ ՝ հունիսի երկուսին ասպարեզ ելան Հայաստանի  երեք ներկայացուցիչներ: Նրանցից Անդրանիկ Կարապետյանը / 89 կգ / համարվում  էր չեմպիոնի իրական թեկնածուներից մեկը: Բայց այդպես չեղավ: Էջմիածինցին  պոկում   վարժությունում իր  կամքին ենթարկեց  174 կգ ծանրությունը և գրավեց երկրորդ տեղը: Հույսը մնաց հրումը:  Առաջին մոտեցումը հաջողությամբ պսակվեց և նա գլխավերևում պահեց 191 կիլոգրամանոց ծանրաձողը: Այնուհետև նա 5 կգ –ով ավելացրեց ծանրաձողի քաշը, որը հաղթահարել չկարողացավ մեր պատվիրակը և երկամարտի 365 կգ արդյունքով եզրափակեց առաջին հնգյակը:

Նույն քաշային մեր երկրորդ պատվիրակ Վարդան Մանուկյանը պոկումում  160 կգ –ով յոթերորդն էր: Հրումում նա  զրո ստացավ: Նման ճակատագիր վիճակվեց նաև կանանց առաջնության մասնակից մեր   Տաթև Հակոբյանին / 76 կգ /, թեև նա պոկումում  104 կգ արդյունքով ճանաչվեց երրորդը,  իսկ  զրո ստացավ դարձյալ հրումում:

Այսօր ՝ հունիսի 3-ին, ժամը 22։00-ին, մրցահարթակ կելնեն մեր  Դավիթ Հովհաննիսյանը և  Արա Աղանյանը   / երկուսն էլ՝ 96 կգ /: