Հայաստանի ազգային օլիմպիական կոմիտեի նախագահ Գագիկ Ծառուկյանն ընդունել է Եվրոպայի առաջնությունից վերջերս վերադարձած մարմնամարզության Հայաստանի հավաքականի անդամներին և գլխավոր մարզիչ Հակոբ Սերոբյանին:

Հանդիպման ընթացքում ՀԱՕԿ նախագահը շնորհավորեց հայ մարզիկներին, ինչպես նաև  Հայաստանի 20-րդ դարի լավագույն մարզիկ, ՀԱՕԿ պատվավոր նախագահ, Հայաստանի մարմնամարզության ֆեդերացիայի նախագահ Ալբերտ Ազարյանին՝ Եվրոպայի առաջնությունում գերազանց արդյունք գրանցելու համար:

«Երբ տեսնում ես այսպիսի տաղանդավոր տղաների, ովքեր հայ ազգի պատիվը բարձր են պահում, հպարտանում ես, որ հայ ես: Շնորհավորում եմ բոլորիդ: Սպասված արդյունքներն արդեն կան: Պետք է կարողանաք ավելի շատ ներդնել, որպեսզի ուրախացնեք և՛ ձեր ծնողներին, և՛ մարզիչներին, և՛ ժողովրդին, և՛ մեզ: Դուք շատ մոտ եք կանգնած դրան: Նայելով ձեր մարզիչի աչքերին՝ տեսնում ես այն ուրախությունը, որը միայն հարազատի աչքերում կտեսնեիք: Ձեր հաջողությունն առաջին հերթին նրանցն է: Դուք միշտ մեր ուշադրության կենտրոնում եք: Ցանկացած հարց, դիմում, խնդրանք անպատասխան չի մնացել և չի մնա: Ձեր կողքին ենք լինելու»,- ասաց ՀԱՕԿ նախագահ Գագիկ Ծառուկյանը:

Մարմնամարզության Եվրոպայի առաջնությունում Հայաստանի հավաքականի անդամները նվաճել են 1 ոսկե և 3 արծաթե մեդալ: Նժույգթափեր վարժությունում Եվրոպայի չեմպիոն դարձավ Հարություն Մերդինյանը: Երիտասարդների մրցապայքարում արծաթե մեդալ էր նվաճել Արթուր Ավետիսյանը:

ՀԱՕԿ լրատվության բաժին