Երևանի Րաֆֆու անվան հիմնական դպրոցում ավարտվեց սեղանի թենիսի ավանդական միջբուհական բաց առաջնությունը, որն այս տարի կայացավ Հայաստանի ազգային օլիմպիական կոմիտեի և «Կելմե»-ի աջակցությամբ:

Ինչպես ՀԱՕԿ լրատվականի հետ զրույցում նշեց «Հայ-ռուսական երիտասարդական միասնություն» հասարակական կազմակերպության նախագահ Գոհար Ղումաշյանը, մրցաշարն անցկացվում է ամեն տարի Հայաստանում Ռուսաստանի դեսպանատան հետ համատեղ:

«Ամեն տարի կազմակերպվում են տարբեր մրցաշարեր՝ շախմատի, վոլեյբոլի, բասկետբոլի և ֆուտբոլի: Բացումն արեցինք թենիսի մրցաշարով: Այս տարի մեզ միացան Հայաստանի ազգային օլիմպիական կոմիտեն և «Կելմե» ընկերությունը, ինչի համար շատ շնորհակալ ենք»,-ասաց Ղումաշյանը:

Հաղթողներին և մասնակիցներին մրցանակներ հանձնեց ՀԱՕԿ կոմերցիոն բաժնի պետ Մանե Մուրադյանը:

«Հայաստանի ազգային օլիմպիական կոմիտեն՝ ի դեմս նախագահ պարոն Գագիկ Ծառուկյանի, միշտ հետևում է նմանատիպ մարզական միջոցառումների և իր աջակցությունն է ցուցաբերում: Մենք միշտ պատրաստ ենք սատարելու և խրախուսելու ցանկացած մարզական, երիտասարդական միջոցառումների»,- նշեց Մուրադյանը:

Հաղթող դարձավ Հայ-Ռուսական համալսարանի թիմը: 

Լուսանկարներն՝ այստեղ

ՀԱՕԿ լրատվության բաժին