Ետևում մնացին  Փարիզում  անցկացված օլիմպիական ամառային 33 –րդ  խաղերը: Դա եզակի միջոցառում էր  քաղաքի կենտրոնում տեղակայված մրցասպարեզներով, Սենա  գետի վրա կայացած բացման հանդիսավոր արարողությամբ . . .

Իսկ ի՞ նչ է  սպասվում չորս տարի անց՝ 2028թ.  Լոս Անջելեսի մարզահանդեսում: Ի՞նչ տարբերակներ են փնտրում կազմակերպիչները:  

Եթե Փարիզում  կառուցվել է  ընդամենը երկու նոր ասպարեզ, ապա 2028թ.  խաղերի համար նորերը  չեն կառուցվի։ Ի դեպ,  կալիֆորնիական այդ քաղաքն արդեն  հյուրընկալել է ամառային օլիմպիական խաղեր՝ 1932թ. և 1984թ. և այդ ժամանակից ի վեր օգտագործվում են  հիմնական ենթակառուցվածքները:

Ամենահինը Լոս Անջելեսի հուշահամալիրի և Ռոուզ Բոուլ ֆուտբոլային մարզադաշտերն են: Դրանք կառուցվել են 1920-ականններին: Հետաքրքիր է, որ  երկուսն էլ   պատմության մեջ առաջինը կլինեն, որտեղ երեք  խաղեր են անցկացվում:

Լողի մրցաշարը նախատեսված է  Saw-Fi մարզադաշտում: Այն տեղավորում է մինչև  70 հազար հանդիսական: Սակայն նստելատեղերը կիսով չափ կկրճատվեն: Այնուամենայնիվ, դա օլիմպիական լողի պատմությունում ամենամեծը կլինի:  

Լողափնյա վոլեյբոլի մրցումները,  ի տարբերություն Փարիզի, կկայանան  իսկական լողափում. Լոս Անջելեսի համար  դա խնդիր չէ:  

Քաղաքից դուրս՝ Օկլահոմայում,  կանցկացվեն  սոֆթբոլ և թիավարության սլալոմ մարզաձևերը:  

Չի կառուցվի նաև օլիմպիական գյուղ: Մարզիկները կբնակվեն Կալիֆորնիայի համալսարանում։

Չնայած մարզահամալիրների  շինարարության խնայողություններին, խաղերի բյուջեն առայժմ  գնահատվում է 7 միլիարդ դոլար, ավելի քիչ, քան Փարիզում, թեև չորս տարի կա և դեռ շատ բան կարող է փոխվել:

Կազմակերպիչները որոշել են  չսահմանափակվել մեկ տարբերանշանով / դրանք ավելի շատ կլինեն/:  Հիմքում  նույն՝ մեծ սև L տառն է  և 28 թիվը,  A տառը միշտ տարբեր է: Ի դեպ,  պատկերագրերի ստեղծմանը մասնակցել են քաղաքի հայտնի բնակիչներն ու աստղերը.  երաժիշտներ, արվեստագետներ, մարզիկներ և այլն։

«Փարիզ 2024»-ի կազմակերպիչները ցանկացան էկոլոգիապես մաքուր խաղեր անցկացնել. նրանք հրաժարվեցին օդորակիչներից: Լոսանջելեսցիները  ցանկություն ունեն  ավելի հեռուն գնալ. օլիմպիական խաղերն անցկացնել առանց մեքենաների:

Լոս Անջելեսը հաճախ անվանում են երթևեկության գերբեռնվածության մայրաքաղաք: Իսկ  խաղերի ժամանակ զբոսաշրջիկների, երկրպագուների և պատվիրակությունների հոսքի պատճառով դա  ավելի կվատանա, որովհետև հեշտ չի լինի մտնել մարզահամալիրներ: Քաղաքային տրանսպորտն այնքան էլ զարգացած չէ այնտեղ:

Լոս Անջելեսի քաղաքապետ Կարեն Բասը առաջարկում է  համալիրներ գնալ   միայն հատուկ ավտոբուսներով:

Լոս Անջելեսի բնակիչներին կառաջարկվի աշխատել հեռավար, որպեսզի կրճատվի երթևեկությունը:

Մրցումային ծրագրում կլինեն  սքեյթբորդը, ժայռամագլցումը և սյորֆինգը,  բայց Փարիզում նորամուտը նշած բրեյքդանսը չի ընդգրկվի:  Կավելացվեն հինգ նոր մարզաձևեր՝ բեյսբոլ/սոֆթբոլը, կրիկետը, դրոշ - ֆուտբոլը, լակրոսը և սքվոշը: Բեյսբոլն ու սոֆթբոլը եղել են  Տոկիո 2020-ում, / Փարիզում  չկային /, լաքրոսը վերջին անգամ ՝  1908թ., իսկ կրիկետը՝ 1900թ.: Առաջին անգամ օլիմպիական խաղերում կլինեն  սկվոշն ու   դրոշ ֆուտբոլը:

Նշված  մարզաձևերը տարածված են ԱՄՆ-ում (բացի կրիկետից) և դա է խաղերի  ծրագրում հայտնվելու հիմնական պատճառը: Կրիկետը  երկրորդ ամենահայտնի մարզաձևն է աշխարհում՝ ֆուտբոլից հետո:

Ինչ վերաբերում է բռնցքամարտին, ապա այդ հարցում  դեռևս չլուծված խնդիրներ կան: Վերջնական որոշումը կկայացվի 2025թ.:  

Լոս Անջելեսում առաջին անգամ փորձարկվելու է ժամանակակից հնգամարտի նոր ձևաչափ՝ առանց ձիասպորտի, բայց արգելքների հաղթահարում մրցաձևով։

Ակադեմիական թիավարությունում կհայտնվի նոր մրցաձև՝  սպրինտ։ Առանձնահատկությունն այն է, որ մարզիկները կմեկնարկեն ցամաքում, հետո կնստեն  նավակ, կնավարկեն ափով և  կավարտեն  ցամաքում։

Լոս Անջելեսի ամառային օլիմպիական խաղերը տեղի կունենան 2028թ. հուլիսի 14-ից՝  հուլիսի 30-ը։ Մեզ մնում է սպասել ևս  չորս տարի: