Այսօր ՝  ապրիլի 6-ին, նշվում է սպորտի միջազգային օրը, որը  սահմանել է ՄԱԿ-ը ՝  ի շահ զարգացման և խաղաղության։ 

Օրը պատահական չէ ընտրված, քանզի վերածնված առաջին  ժամանակակից օլիմպիական խաղերը  մեկնարկել է Հունաստանում, 1896թ.  ապրիլի 6-ին։ Այս տարի լրանում է այդ  խոշոր մարզական իրադարձության 127-ամյակը: 

Այս օրը դիտվում է որպես կարևոր իրադարձություն, որը  ուրվագծում է բարեկամություն, հարգանք և կարևոր այլ  արժեքներ, որոնք աշխարհի միլիոնավոր և, ինչու չէ, արդեն կարող ենք ասել միլիարդավոր մարդկանց ոգեշնչում են  զբաղվել առողջարարական ֆիզկուլտուրայով, մեծ սպորտով  և առողջ ապրելակերպ վարել: 

Սպորտը միջոց է   համայն մարդկության համախմբման ,  ներշնչման , առաջընթացի, խաղաղության, հաշտության ու մերձեցման համար: Չէ որ հասարակությունը  միասին է ուրախանում նշանակալից նվաճումներով, ասել է թե՝ սպորտի շնորհիվ  են աշխարհամասերը միմյանց կամրջվում, որի արդյունքում հաղթահարվում են կրոնական, էթնիկական  և տնտեսական արգելքները: Ասածը հաստատող որքան մեծ խորհուրդ և իմաստնություն կա ժամանակից օլիմպիական խաղերի հիմնադիր, բարոն Պիեռ դը Կուբերտենի ուղերձում. << Օ սպորտ, դու խաղաղություն ես . . . >>:

Սպորտը, հիրավի, հանդիսանում է  որպես առողջության պահպանման միջոց:  Բայց բնագավառի ձգողական  ուժն այնքան մեծ է, որ մարդուն մղում է դեպի մարզական բարձունքներ:

Մեր երկիրը համարվում է սպորտային: Ասածն է հաստատում  հայաստանցի մարզիկների նվաճումները օլիմպիական խաղերում , փառատոներում, աշխարհամասային  մարզական խաղերում և այլուր:

Հիշենք և գնահատենք հաղթանակների գինը, արժեքը, որոնք մեծապես խթանում են սպորտի առաջընթացին և ոլորտ են ձգում մեր մանուկներին ու պատանիներին:

Հայաստանի ազգային օլիմպիական կոմիտեն այսօրվա տոնի առթիվ  շնորհավորում է մարզաշխարհի բոլոր մարդկանց, ովքեր քրտնաջան աշխատում են մեր երկրում սպորտի հետագա զարգացման, այն նոր մակարդակի հասցնելու և օլիմպիզմի մաքուր ու վեհ գաղափարները քարոզելու համար: