Ըմբշամարտի միացյալ աշխարհը  (UWW) Փարիզի օլիմպիական խաղերից առաջ  հրապարակել է    համաշխարհային վարկանիշային միավորների նոր  աղյուսակը:

Ազատ ոճայինների ցանկը  կազմելիս հաշվի է  առնվել  նաև Բուդապեշտում օրերս  կայացած միջազգային մրցաշարի արդյունքները:

Ինչպես ավելի վաղ հաղորդվել էր, որքան բարձր է ըմբիշի դիրքը դասակարգման աղյուսակում , նա  այնքան ավելի բարենպաստ մրցակցային վիճակ  կունենա :

Ազատ ըմբշամարտի ցանկում մեր Արսեն Հարությունյանը / 57 կգ / 41 000  միավորով երրորդն է, Վազգեն Թևանյանը / 65 կգ / և Արման  Անդրեասյանը / 70 կգ / ունեն համապատասխանաբար  52 500 և 54 000 միավոր ու գլխավորում են իրենց քաշային կարգերի առաջին հորիզոնականը:

Հիշեցնենք, որ Արման Անդրեասյանի քաշային կարգը օլիմպիական չէ:

Հունահռոմեական ըմբշամարտում մեր  Արթուր Ալեքսանյանը  / 97 կգ /  52 000 միավորով աղյուսակում առաջինն է: Նրա թիմակիցներ  Սլավիկ Գալստյանը  / 67 կգ ՝ 35 000 միավոր  /  և  Մալխաս Ամոյանը  / 77 կգ՝ 46 000 միավոր /  չորրորդն են իրենց քաշային կարգերում: Առաջին տասնյակում  են նաև Գևորգ Ղարիբյանը / 60 կգ ՝ 34 400 միավոր/  և  Հրաչյա Պողոսյանը / 63 կգ ՝ 33 100 միավոր/  և  զբաղեցնում են համապատասխանաբար հինգերորդ ու վեցերորդ աստիճանները: Նշենք, որ Գևորգին, ավաղ, չի հաջողվել  նվաճել օլիմպիական ուղեգիր, իսկ Հրաչյայի քաշային կարգը օլիմպիական չէ: