Արտաշատում անցկացվեց Հայաստանի աթլետիկայի առաջնությունը:  Մրցումներին հայտավորված 84 մարզիկ –մարզուհիները  իրենց ունակությունները  դրսևորեցին վազքեր, ցատկեր, նետումներ մրցաձևերում:

Հանրապետական նոր ռեկորդ սահմանեց Ալիսսոն Հավերսոնը: Այդ մարզուհին  400 մետրը վազեց  53, 37 վայրկյանում:

Անձնական ռեկորդ գրանցեց և սպորտի վարպետի նորման լրացրեց արտաշատցի եռացատկորդ Գոռ Հովակիմյանը՝ 16մ. 25 սմ.: Նրա համաքաղաքացի Սամվել Գևորգյանը մրցակցությունից դուրս էր արագավազքում: Նա 100 մետրն անցավ 10.93, իսկ 200 մետրը ՝ 22. 72 վայրկյանում: Նույն մրցատարածություններում, 11. 86 և 24 . 54 վայրկյան արդյունքներով կանանց պայքարում  լավագույնն էր  երևանցի Գայանե Չիլոյանը:

Կանանց 800մ. վազքում  գոհացնող ցուցանիշի հասավ վանաձորցի Էլլադա Ալավերդյանը՝   2. 09, 15:

Ցատկերում առաջին  էին կապանցիները: Թերևս գնահատելի է հեռացատկորդ Վահե Արզումանյանի արդյունքը ՝ 7մ. 29 սմ.:

Ի դեմս Վանիկ Առաքելյանի Գյումրին նույնպես ունեցավ իր չեմպիոնը: Նա յոթ  կիլոգրամանոց գունդը հրեց 15մ. 10 սմ.: