Իրանի  Մազանդարան  քաղաքում  անցկացվեց  խճուղային հեծանվավազքի  միջազգային երիտասարդական  մրցաշարը: Մասնակցեցին միջկասպյան ինը երկրների ներկայացուցիչներ, նրանց թվում ՝ Հայաստանի թիմը: Ասենք, որ մեր հավաքականը համալրված էր պատանի հեծանվորդներով:

Եռօրյա պայքարում մասնակիցները հաղթահարեցին հաջորդաբար 54 կմ., 70 կմ. և 87, 5 կմ. մրցատարածություն: Վերջին ինը կմ. տարածությունը ուներ 16 տոկոս թեքության վերելք: Եվ նման դժվարին պայքարում  մեր պատվիրակները իրենցից 2 – 3 տարով մեծ մրցակիցների դեմ  մրցությունում պատվով քննություն հանձնեցին: Այս մասին զրույցի ժամանակ ասաց մարզաձևի հանրապետական ֆեդերացիայի փոխնախագահ, հեծանվային սպորտի օլիմպիական հանրապետական ՄԴ –ի ուսումնական մասի վարիչ Գրիգոր Համբարձումյանը: Հետաքրքիր է, որ մեկնարկում, ծովի մակերևույթից 700մ. բարձրություն ունեցող 87, 5 կմ  ճանապարհը  եզրագծում  արդեն ուներ 2700մ. բարձրություն, այն էլ՝ 16 տոկոս վերելքներով: Թթվածնի խտության նման մեծ տարբերությամբ մրցումային առաջադրանքը կարողացան հաղթահարել մեր հեծանվորդները:

Անհատական մրցավեճին մասնակցած 44 մասնակիցների միջև Հայաստանի հինգ տղաներից Նարեկ Մանուկյանը 11 –րդն էր, իսկ նրա թիմակից  Էդգար Գրիգորյանը ՝ 19 –րդը, որը նույնպես վատ ցուցանիշ չէ: 

Երկու օր հետո, մայիսի 23 26 –ը տեղի կունենա խճուղային հեծանվավազքի Հայաստանի առաջնությունը: Լավագույնները կհամալրեն երկրի գլխավոր թիմը, որը կնախապատրաստվի Գերմանիայի Կոտբուս քաղաքում  հուլիսի 9 – 14 –ը կայանալիք հրապարակային հեծանվավազքի Եվրոպայի առաջնությանը:  Այնուհետև հավաքականը Չինաստանում  կմասնակցի օգոստոսի 21 –ին սկսվելիք  աշխարհի առաջնությանը: