Տոկիոյում կայանալիք 2020 թվականի օլիմպիական խաղերի ժամկետները մեկ տարով հետաձգելու կապակցությամբ, մարմնամարզության միջազգային ֆեդերացիան / FIG  / մի շարք կարևոր որոշումներ է կայացրել։ Դրանք տեղեկատվական բնույթի են և հիմնականում  վերաբերում են  մարզիկներին ու  ազգային ֆեդերացիաներին:

Օլիմպիական խաղերի սպորտային , գեղարվեստական  մարմնամարզության  և ցատկացանցի  324 տեղերից գրեթե 75% -ը որակավորված է։ Բոլոր ստացած ուղեգրերը մնում են ուժի մեջ։ COVID-19 –ի  համաճարակը  խանգարեց մարտի կեսերից մայիսի վերջը  վարկանիշային մրցումների անցկացմանը։

Տոկիո հրավիրված  մրցավարները , ովքեր պետք է  սպասարկեին խաղերը, նույնպես կպահպանեն իրենց տեղը։

Նշած մարզաձևերի  մի շարք մրցումներ հետաձգվել են կամ չեղարկվել։ Չի տեղափոխվի  2021թ․  Դանիայի Կոպենհագենում նշանակված սպորտային մարմնամարզության աշխարհի առաջնությունը: 

Գործադիր կոմիտեն քննարկել է նաև ֆեդերացիայի հաշվետու ընտրական  համագումարի անցկացման  հարցը։ Այն պետք է կայանար 2020 թ․ հոկտեմբերին՝ Թուրքիայի Անթալիայում ։ Միջոցառումը  տեղափոխվել է 2021 թ․ հոկտեմբեր։ Վերջնական որոշումը կկայացվի համաճարակի ավարտից հետո։ Ազգային ֆեդերացիաների համար սահմանված թեկնածուների առաջադրման վերջնաժամկետը մնում  է  անփոփոխ ՝ 2020 թ․  մայիսի 20-ը ՝ ներառյալ։  

Հիշեցնենք , որ երևանցի  մարմնամարզիկ Արթուր Դավթյանն ունի խաղերի  ուղեգիր, իսկ սպորտային մարմնամարզության  մրցաշարի սպասարկող մրցավարների  թվում կլինի Արթուրի անձնական և հավաքականի գլխավոր մարզիչ,  միջազգային բարձրագույն կարգի մրցավար  Հակոբ Սերոբյանը։