Ավելի քան 70,000 հանդիսական է  ներկա եղել  Փարիզի  Ելիսեյան դաշտերում և Հաղթական կամարի շուրջ անցկացված  օլիմպիական խաղերի ավարտի տոնակատարությանը:

Միջոցառումը հեռարձակվել է  Ֆրանսիայի հեռուստատեսության ուղիղ եթերով, որը  դիտել է ավելի քան 10 միլիոն մարդ: Այդկերպ հարգանքի տուրք է մատուցվել  բոլոր ֆրանսիացիներին՝ կամավորականներին, մասնագետներին, երկրպագուներին, որոնց ներդրումն առանցքային է եղել խաղերի հաջող կայացման համար:

Դեռևս 1906թ.  ժամանակակից օլիմպիական խաղերի հիմնադիր Պիեռ դե Կուբերտենը գավաթ է սահմանել, որը  ավանդաբար  շնորհվում է կազմակերպություններին կամ համայնքներին՝ սպորտին բացառիկ նվիրվածության համար:

Ֆրանսիայի նախագահ Էմանուել Մակրոնի,  վարչապետ Միշել Բարնիեի, Փարիզի քաղաքապետ Անն Հիդալգոյի ներկայությամբ, ՄՕԿ-ի նախագահ Թոմաս Բախը պատվավոր  մրցանակը  հանձնել է   Ֆրանսիայի ժողովուրդը ներկայացնող կամավորներից և երկրպագուներից կազմված խմբին:

Դիմելով արարողությանը հետևող բազմահազար հանդիսականներին, ՄՕԿ-ի նախագահն ասել է, որ դուք՝ ֆրանսիացիներդ, ձեր սրտերում եք ընդունել օլիմպիական խաղերը և ստեղծել  անզուգական մթնոլորտ Փարիզիում և ամբողջ Ֆրանսիայում։ Հյուրերին և օլիմպիականներին  ընդունել եք  ջերմությամբ և ոգևորությամբ՝ անկախ քաղաքական տարաձայնություններից:

Շնորհակալություն, Ֆրանսիա:

Փարիզի քաղաքապետ Անն Իդալգոն ՄՕԿ –ի նախագահին է հանձնել   Մեծ Վերմեյլի մեդալը, որը մայրաքաղաքի բարձրագույն պարգևն է: