Լողի հանրապետական ֆեդերացիայի  գլխավոր քարտուղար Ռաֆաել  Վասիլյանը  որոշակի հույսեր է փայփայում  Արթուր Բարսեղյանի հետ: Այդ մարզիկը արժանի է,  և կարող է դառնալ Փարիզի օլիմպիական խաղերի մասնակից, քանզի նա <<  արագ վայրկյաններ >>  է ցույց տալիս ազատ լողաոճում:  Իսկ ուղեգիր ունենալու հարցը կորոշվի հունիսի 17 – 23 –ը Սերբիայի մայրաքաղաք Բելգրադում անցկացվելիք Եվրոպայի առաջնությունում: Այն օլիմպիական վարկանիշային բնույթի ստուգատես է:

Մեր զրուցակիցը լավատես է նաև մրցավայր մեկնող մարզուհիների նկատմամբ: Արթուրից բացի, վաստակաշատ մարզիչ Արմինե Ավետիսյանը  Բելգրադ կուղեկցի նաև չորս լողորդուհու՝ Վարսենիկ Մանուչարյանին, Եվա Կարապետյանին / երկուսն էլ ՝ բատերֆլայ ոճ /, Անի Պողոսյանին / ազատ  ոճ / և Դիանա Մուսայելյանին / համալիր  լող /:

ՀՀ հավաքականը ուսումնամարզական  հերթական հավաքը Ծաղկաձորում կավարտի մայիսի 26 –ին և << կիջնի >> մայրաքաղաք:

Մարզումները Երևանում կանցկացվեն միջազգային չափանիշներին համապատասխանող <<  Ռիբոկ >>   50 մետրանաոց լողավազանում:  Մասնագետները հիմնականում ուշադրություն կհատկացնեն մարզվողների տեխնիկատակտիկական որակների բարելավմանը:

Իսկապես դժվարին խնդիր է առաջադրված լողորդներին: Նրանք նույնպես մեծ ցանկություն ունեն  մարզիչների  հույսերն արդարացնելու և օլիմպիական դառնալու համար:

Ի դեպ, Արթուր Բարսեղյանը և Վարսենիկ Մանուչարյանը օլիմպիական խաղերում հանդես գալու փորձ ունեն և մասնակցել են նախորդ ՝ Տոկիոյի համաշխարհային մարզահանդեսին: Այն ժամանակ Արթուրին շնորհավորելու առիթ ունեցանք:

Տղամարդկանց 100մ. լողաոճում, 72 մասնակիցների պայքարում,  38 –րդ  հորիզոնականում էր  հանգրվանել մեր պատվիրակը: Արդյունքը  այնքան էլ  գոհացնող  չէր: Բայց ուրիշ է, երբ մարզիկը գերազանցում է  իր երկրի բարձրագույն նվաճումը: Մեր Արթուր Բարսեղյանը նշած մրցատարածությունն անցավ 49, 78 վայրկյանում: Իր լողահերթում, ութ մրցակիցների պայքարում, նա վերջնագիծը հատեց երկրորդը: Այդուհանդերձ Արթուրը դուրս մնաց պայքարի շարունակությունից, քանզի 16 առաջատարների շարքում տեղ չունեցավ:

Շատ ենք ուզում, որ այս տարի էլ լողորդներին շնորհավորելու առիթ ունենանք: