ՄԵԾ ՄԻՋՈՑԱՌՈՒՄՆԵՐՈՒՄ ՄԱՆՐՈՒՔՆԵՐ ՉԵՆ ԼԻՆՈՒՄ
Ֆրանսիան աշխարհի տարբեր երկրներից ավելի քան երկու հազար ոստիկանների օգնություն է խնդրել՝ 113 օր հետո մեկնարկող 33 –րդ ամառային օլիմպիական խաղերում ցանկալի կարգուկանոն հաստատելու համար:
Տեղական օրինապահ ուժերը ակնկալում են հսկողությունը ուժեղացնել նախատեսված 46 երկրից ժամանող գործընկերներով:
Համալրումները հիմնականում կլինեն ԵՄ երկրներից, սակայն սպասվում են նաև անվտանգության ուժեր՝ Հարավային Կորեայից, Հարավաֆրիկյան հանրապետությունից, Հնդկաստանից և Ավստրալիայից։
Նախատեսվում է, որ եկողների շնորհիվ կավելանա վարժեցրած շների քանակը, որոնք պետք է տեղաբաշխվեն օդանավակայաններում, երկաթուղային կայարաններում և հյուրանոցներում։
Եթե մրցումներում սպասվում են, օրինակ, մեծ թվով հանդիսականներ Միացյալ Նահանգներից, ապա տվյալ մրցավայրում պետք է հերթապահեն ոստիկաններ՝ անգլախոս երկրներից:
