Երևանի նախկին  « Միկա »  մարզապալատում անցկացվեց «ՀԱՕԿ նախագահ Գագիկ Ծառուկյանի գավաթ» անվանումով  սամբոյի միջազգային  առաջին մրցաշարը։ 

Մրցագորգ ելան տղամարդկանց յոթ / 58 կգ., 64 կգ., 71 կգ., 79 կգ., 88 կգ., 98 կգ., + 98 կգ. / և  կանանց երկու / 54 կգ., + 80 կգ. /   քաշային կարգերի ներկայացուցիչներ:

Մասնակցեցին 22 երկրների պատվիրակներ: Մրցանակային հիմնադրամը  200  հազար ԱՄՆ դոլար Էր:

Շքեղ էր ստուգատեսի բացման հանդիսավոր արարողությունը: Տրիբունաները լիովին ծանրաբեռնած մարզասերներին կազմակերպիչները  հաճելի բազում անակնկալներ մատուցեցին:

Սամբոյի միջազգային ֆեդերացիայի նախագահ Վասիլի Շեստակովը  ողջույնի խոսքում շեշտեց, որ մարզաձևի նման խոշոր մրցաշար աշխարհում առաջին անգամ է հովանավորում  ազգային օլիմպիական կոմիտեն: Այդ երկիրը Հայաստանն է և նրա օլիմպիական ընտանիքի ղեկավար,  մեծանուն բարեգործ Գագիկ Ծառուկյանը: 

Ծափողջույններով մարզասերը դիմավորեց ՀԱՕԿ նախագահին: Գագիկ Ծառուկյանը շնորհակալություն հայտնեց ՀՀ սամբոյի ֆեդերացիային և կազմակերպական աշխատանքում ներգրավված բոլոր  մարդկանց:

Պարոն Ծառուկյանը նաև նշեց՝  մեծ պատիվ է, որ մրցաշարին մասնակցում են աշխարհի ուժեղագույն սամբիստները: Ուրախացանում է և այն,  որ միջազգային օլիմպիական կոմիտեն երկու տարի առաջ ճանաչեց սամբո ըմբշամարտը: Երևանյան մրցաշարը յուրատեսակ քայլ է սամբոյի մուտքը օլիմպիական ընտանիքի լիարժեք անդամ դառնալու համար:

ՀԱՕԿ նախագահը մրցաշարը հայտարարեց բացված և հնչեց ՀՀ օրհներգը:

Մասնակից բոլոր երկրների պատվիրակությունների ղեկավարները ստորագրություններով հաստատեցին մարզաձևի օլիմպիական առաջին տարեգիրքը, և այն,  ինչպես նաև խորհրդանշական գավաթը  Գագիկ Ծառուկյանը հանձնեց մարզաձևի միջազգային ֆեդերացիայի նախագահ Վասիլի Շեստակովին: Վերջինը, ի դեպ,  սամբոյի  միջազգային ֆեդերացիայի 85 –ամյակի առթիվ ստեղծված  ոսկե հուշամեդալ նվիրեց պարոն Ծառուկյանին:

Հայաստանցի  մարզիկները նվաճեցին չորս ոսկե, մեկ արծաթե և երեք բրոնզե պարգև։ Պատվանդանի չեմպիոնական աստիճանին կանգնեցին  Դավիթ Հովսեփյանը, Մաքսիմ Մանուկյանը, Վահագն Չալյանը և Արսեն Խանջյանը: Վարսիկ Գրիգորյանն արժանացավ արծաթե, իսկ  Կառլեն Մահինյանը, Արամ Աղաջանյանը, Բորիս Շատվերյանը՝ բրոնզե մեդալների։

Մեզանում հյուրընկալված մասնագետները զրույցներում խոստովանեցին, որ նմանը չունեցող միջազգային ստուգատես  էր երևանյանը: Նաև իրենք ՝ մասնակիցները գոհ մնացին և մեր մայրաքաղաքին հրաժեշտ տվեցին աշնանը մեզանում կայանալիք աշխարհի առաջնությունում կրկին հանդիպելու ցանկությամբ: