Հայաստանի ազգային օլիմպիական կոմիտեն,      նախագահ   Գագիկ Ծառուկյանի  ղեկավարությամբ, ՄՕԿ –ի  << Օլիմպիական համերաշխություն   >>  ծրագրի  շրջանակներում,    ամեն տարի բազմաթիվ միջոցառումներ է կազմակերպում:  Դրանք առաջնորդվում են օլիմպիական կարգախոսով ՝ արագ, ուժեղ , բարձր՝ միասին:

Երևանի օլիմպիական պետական մարզական քոլեջում ՀԱՕԿ –ը երեկ հանդիսավոր արարողություն անցկացրեց: Այն նվիրված էր երեխաների պաշտպանության միջազգային օրվան: Այդ առթիվ մայրաքաղաքի  12 համայնքների հանրակրթական դպրոցների աշակերտներով  համալրված  վոլեյբոլի, բասկետբոլի, հանդբոլի և ֆուտբոլի թիմերի մասնակցությամբ մրցաշար տեղի ունեցավ: Յուրատեսակ այդ մրցումներում  ներգրավված էին  մայրաքաղաքի 48 թիմեր:

Մրցավարտից հետո մասնակիցներին ողջունեց ՀԱՕԿ նախագահ Գագիկ Ծառուկյանը. 

<< Սիրելի երեխաներ, հարգելի ներկաներ, մասնակիցներ: Այսօր ամռան առաջին օրն է  ` հունիսի մեկը  և բոլորիս տրամադրությունը  բարձր  է: Չէ որ  երեխաների պաշտպանության միջազգային օրն է , այսինքն   ձեր տոնն է:

Օլիմպիզմի հիմքում  ընկած են համերաշխության, մարդասիրության, խաղաղության, առողջության, ֆիզկուլտուրայի և  սպորտի մասսայանակացման գաղափարները:

Այս անգամ մեր նախաձեռնությունը  ավելի քան հաճելի է, քանզի  միջոցառմանը մասնակցում են  13  - 14  տարեկան տղաներ և աղջիկներ:

Մարզաձևերի ընտրությունը պատահական չէ: Հաշվի ենք  առել այն հանգամանքը, որ նշած ձևերը ներառում են նաև շատ մարզաձևերին բնորոշ որակներ ու տարրեր: Բացի այդ, նպատակ կա օգնել մեզանում գործող ֆեդերացիաներին՝ օժտված տղաներ և աղջիկներ հայտնաբերելու, նրանց  համար սպորտային ուղի հարթելու գործին:

Այսօրվա միջոցառումը հենց այդ նպատակներին է ուղղված: Ձեր շարքերում տեսնում ենք ապագա օլիմպիակաների, աշխարհի ու Եվրոպայի չեմպիոնների:  Դուք պետք  է շարունակեք միջազգային մրցումներում վեր պարզել հայոց եռագույնը և հնչեցնել մեր օրհներգը:

Շնորհավորում  եմ  օրվա առթիվ: Մենք` ավագներս,  ամեն կերպ փորձում ենք նպաստել աճող սերնդի ինչպես մտավոր, այնպես էլ ֆիզիկական ունակությունների զարգացմանը>>:

Միջոցառմանը ներկա էին նաև նշանավոր մարզիկներ, ՀԱՕԿ –ի գործկոմի անդամներ, հայրենական սպորտի պետական և հասարարական կազմակերպությունների ներկայացուցիչներ, մարզասերներ, շատերը:

Ապա սկսվեց  պարգևատրության հաճելի արարողությունը :

Մրցանակակիրները պարգևատրվեցին ՀԱՕԿ-ի հավաստագրերով, մեդալներով, իսկ հաղթողները՝ նաև հեծանիվներով:

Աղջիկների վոլեյբոլի մրցաշարի եռյակում տեղ գտան հաջորդաբար Մալաթիա - Սեբաստիա, Ավան,  Շենգավիթ համայնքների թիմերը, հանդբոլիստուհիներինը՝ Դավթաշենի, Շենգավիթի, Նոր Նորքի ներկայացուցիչները:

Տղաների ֆուտբոլի և բասկետբոլի մրցանակային  եռյակները դասավորվեցին հետևյալ հաջորդականությամբ. Նորք- Մարաշ, Դավթաշեն, Ավան և Մալաթիա –Սեբաստիա, Շենգավիթ և Դավթաշեն վարչական շրջաններ:

Պարգևատրությունը կատարեցին   ՀԱՕԿ  նախագահը, ինչպես նաև  անցյալի և ներկայի նշանավոր մարզիկները: