Հայաստանի հունահռոմեական ոճի ըմբիշներից առաջինը աշխարհի չեմպիոնի պատվին է արժանացել / 1982թ. / երևանցի Բենուր Փաշայանը: Նա նվաճումը կրկնել է նաև հաջորդ մրցաշրջանում:

 Բենուրը Լոս Անջելեսի օլիմպիական խաղերի / 1984թ. / հաղթողի իրական հավակնորդ էր համարվում: Եվ նա կկանգներ չեմպիոնական աստիճանին, եթե ԽՍՀՄ –ը և ընդհանրապես սոցիալիստական երկրները չբոյկոտեին համաշխարհային այդ գլխավոր մարզահանդեսը: Փոխարենը, Մոսկվայում կայացած բարի կամեցողության խաղերում / Дружба-84 /,   Բենուրը գետնեց աշխարհի ուժեղագույն ըմբիշներին, հռչակվեց չեմպիոն և ճանաչվեց մրցաշարի լավագույն ըմբիշ:

Հայ  մարզիկն ընդհանրապես տարիքային բոլոր խմբերի մրցաշարերում գրեթե միշտ հաղթող է ճանաչվել: Ժամանակի ամենահեղինակավոր մասնագետները նշել են, որ մրցագորգի վրա, հենց գոտեմարտի ընթացքում, նա նոր հնարքներ ու տարրեր է կատարել:

Այդ ամենը գնահատելով,  Երևանի քաղաքապետարանի սպորտ բաժինը, մարզաձևի հանրապետական ֆեդերացիան և Բենուրի ընկերները համատեղ կազմակերպեցին և հաջողությամբ անցկացրին կյանքին անժամանակ հրաժեշտ տված փառահեղ ըմբիշի հիշատակը հավերժացնող միջազգային առաջին մրցաշարը:

Մայրաքաղաքի «Դինամո» մարզադահլիճի  մրցագորգերի վրա, տանտերերից բացի, իրենց հմտությունները ցուցադրեցին նաև Ռուսաստանի, Բուլղարիայի, Բելառուսի, Վրաստանի և Իրանի պատվիրակները:  

Հայաստանի հավաքականից առաջին տեղը գրավեցին Սլավիկ Գալստյանը / 67 կգ /, Շանթ Խաչատրյանը / 72 կգ / և Մաքսիմ Մանուկյանը / 82 կգ /:   

Նրանց հինգ թիմակիցներ դարձան երկրորդ մրցանակակիրներ: