Օլիմպիական խաղերում հաջողության հասնելու մասին  զրույցներում   ասվում  է, որ դա բոլորովին այլ մրցաշար է, որ այնտեղ մեդալակիր դառնալը  ամեն մարդու բան չէ, գրեթե ուժերից վեր գործ է և այլն:

Իհարկե քառամյակը մեկ անցկացվող համաշխարհային մարզահանդեսում հաղթանակի  հասնելը դժվար է , բայց՝  ոչ անհասանելի:

Ակամա հարց է առաջանում , իսկ ով է ասում , որ այլ մրցաշարերում մրցանակի արժանանալը  հեշտ է: Դժվար են բոլոր մրցաշարերը, դժվար են  տարիքային բոլոր խմբերի մրցումներում:

Ով է ասել , որ, օրինակ,  հունահռոմեական ոճի ըմբիշ Կարեն Ասլանյանը  քիչ ջանք է  գործադրել հաջողությունների հասնելու համար: Նա  պատվո պատվանդանին է կանգնել համապետական, եվրոպական  ստուգատեսներում, աշխարհի առաջնություններում, միջազգային բարձրակարգ մրցաշարերում և այլուր: Հաղթանակներ  է տարել պատանեկան , երիտասարդական և մեծահասակների ստուգատեսներում: Եղել են դեպքեր, երբ կողմնակալ մրցավարության հետևանքով  մեր մարզիկի փոխարեն հաղթող է ճանաչվել  մեկ ուրիշը: Բայց  երևանցին չի ընկճվել: Հակառակը, դրսևորել է   անկոտրում  կամք   և առավել  եռանդով է  շարունակել  մարզումները:

Տարիներ առաջ, անձրևոտ մի օր,  << Սպարտակի >>  ստադիոնում  մի պատանի էր վազում: Մոտեցանք վազքուղյակին: Այնտեղ գտնվող վաստակավոր մարզիչ Սամվել Գևորգյանն ասաց , որ պատանին իր սանն է,  Կարեն է անունը: Բնածին օժտված, շնորհալի տղա է և նրան մարզական լավ ապագա է սպասվում: 

Մասնագետի  խոսքը ապացուցվեց սանի տարած հաղթանակներով: Ըմբիշը մեդալներ է նվաճել  աշխարհի,Եվրոպայի  առաջնություններում և միջազգային բարձրակարգ մրցաշարերում:

Կարեն Ասլանյանի հերթական  հաջողությունը գրանցվեց Սոֆիայում  բոլորովին վերջերս անցկացված միջազգային օլիմպիական վարկանիշային մրցաշարում: Նա  խոսուն հաղթանակներ տոնեց հաջորդաբար  նորվեգացի Մորտեն Թորեսենի , ղրղզ Ամանտուր Իսմայիլովի,  ֆրանսիացի Մամադասա Սիլանի, ուկրաինացի Պավրիզ Նասիբովի նկատմամբ  և դարձավ   մրցաշարի հաղթող: Բայց գլխավորն այն է, որ Կարենը արժանիորեն նվաճեց Տոկիոյի խաղերին  մասնակցելու ուղեգիր:

Հավատանք, որ 25 –ամյա շնորհալի հայորդին   67 կգ քաշայինների պայքարում հաղթանակներ կգրանցի իր հաշվին  և  օլիմպիական խաղերից հայրենիք կվերադառնա մեդալով: