Մայիսի 13-14-ը Ռուսաստանի Օրենբուրգ քաղաքում կանցկացվի ձյուդոյի Եվրոպայի գավաթի խաղարկության փուլը, որին Հայաստանը կներկայացնի 10 մարզիկ: Այս մասին ՀԱՕԿ լրատվականի հետ զրույցում ասաց ազգային հավաքականի գլխավոր մարզիչ Արմեն Նազարյանը:

«10 ձյուդոիստների մեջ է նաեւ Սոսե Բալասանյանը (52 կգ): Եվրոպայի գավաթից հետո թիմը հավաք կանցկացնի Օրենբուրգում: Այնուհետեւ Ֆերդինանդ Կարապետյանը (73 կգ) եւ Անդրանիկ Չափարյանը (81 կգ) կմեկնեն ռուսական Եկատերինբուրգ, որտեղ կմասնակցեն «Մեծ Սաղավարտի» խաղարկությանը (մայիսի 20-21-ը):

Առջեւում երեք կարեւոր միջազգային մրցաշարեր ունենք` աշխարհի առաջնությունը (Բուդապեշտ, օգոստոսի 28-ից սեպտեմբերի 3-ը), ամառային Ունիվերսիադան (Թայբեյ, օգոստոսի 19-ից 30-ը) եւ մինչեւ 23 տարեկանների Եվրոպայի առաջնությունը (Չեռնոգորիա, նոյեմբերի 10-ից 12-ը):

Աշխարհի առաջնությանը կմասնակցեն Ֆերդինանդ Կարապետյանն ու Անդրանիկ Չափարյանը: Հնարավոր է երրորդ մարզիկի մասնակցությունը: Դա պարզ կլինի մոտակա հավաքների եւ մրցումների արդյունքում: Ունիվերսիադային նախատեսում ենք եւս երեք ձյուդոիստի հայտ ներկայացնել: Մնացածները հանդես կգան մինչեւ 23 տարեկանների Եվրոպայի առաջնությունում»,-ասաց Արմեն Նազարյանը: