Ֆրանսիայի դերձակների  բանակը լծված է  Փարիզի օլիմպիական արարողությունների համար  տարազներ ստեղծելու գործին: Դիզայներների կարծիքով իրենք կներկայացնեն պատմության, սպորտի և փառքի եզակի համադրություն:

Կոստյումները  արդեն կախիչների վրա են՝ ծածկոցներով,  որպեսզի աննկատ մնան ու հետո անակնկալ մատուցեն  ներկաներին։

 «Մենք ստեղծում ենք  հագուստներ աշխարհի ամենամեծ երեկույթի համար», - ասել է հանդերձանքի  պատասխանատու  Դաֆնե Բերգին, ով նախկինում  Ջոն Գալիանոյի ղեկավարությամբ աշխատել է  Dior-ում:

Աշխատանքներում ներգրավված են  թատրոնի, օպերայի և կինոյի փորձառու 20  դիզայներներ, ովքեր  վերահսկում են ավելի քան 500 արհեստավորների աշխատանքը:

Հուլիսի 26-ին կայանալիք  օլիմպիական խաղերի  բացման հանդիսավոր արարողության համար ներգրավված են գրեթե 300 վարսահարդարներ ու  դիմահարդարներ:

Հագուստի թափոնների և շրջակա միջավայրի աղտոտվածության վերաբերյալ մտահոգության դարաշրջանում շեշտը դրվում է հին և մաշված հագուստի օգտագործման վրա, որը կյանք է ունեցել նախկինում և կունենա նաև  հետո:

Պատմական, հնաոճ ձևերին միացել են ժամանակակիցները:  Պարային հագուստի գործվածքները ընտրված են այնպես, որ ամուր լինի և ապահովի առավելագույն շարժունակություն: