Սլովենիայի Լյուբլանա քաղաքում հունիսի 4 –ին տեղի ունեցավ  ֆուտբոլի ընկերական հանդիպում: Նշած երկրի ընտրանին հյուրընկալեց Հայաստանի գլխավոր թիմին:

Առաջին խաղակեսում  հյուրերը դժգույն, անհետաքրքիր խաղ ցուցադրեցին: Իսկ  10 –րդ  րոպեին դաշտի տերերից Մլակարը գրավեց հյուրերի դարպասը:

Ընդմիջման ժամանակ  Հայաստանի հավաքականի գլխավոր մարզիչ Ալեքսանդր Պետրակովը թե  ինչ խորհուրդներ ու տակտիկական հանձնարարություններ  տվեց իր խաղացողներին՝   հայտնի չէ: Բայց որ  մեր ֆուտբոլիստները  գրագետ գործողութուններով   փոխեցին խաղի ընդհանուր  պատկերը՝ փաստ է: Իսկ եթե գրոհների վերջնամասում  մերոնք  չհապաղեին՝  իրենց  հաղթանակը ապահովված կլիներ:

Մարտունակությամբ և  նվիրական խաղով կրկին աչքի ընկավ թիմի ավագ Վարազդատ Հարոյանը: Նա նաև  56 –րդ րոպեին գլխի հարվածով գնդակը մխրճեց տանտերերի դարպասը և հավասարեցրեց հաշիվը: Ճիշտ է, յոթ րոպե հետո սլովենացի Իլիչիչը  դիպուկ հարվածով  իր թիմի օգտին գոլ գրանցեց և հաղթանակ ապահովեց, բայց, միևնույն է, մերոնք վարպետությամբ ավելի բարձր էին:

Դաշտի տերերը հաղթեցին 2 : 1 հաշվով:

Հունիսի 7 -ին, Երևանում,  Հայաստանի հավաքականը կընդունի Ղազախստանի ընտրանուն: