Ընդամենը 52 օր  է մնացել  Փարիզի ամառային  մարզահանդեսի մեկնարկին և  օրավուր ավելի լսելի է դառնում օլիմպիական խաղերի շունչը:  Անշուշտ, առավել նպատակային են դառնում նախապատրաստական պարապմունքները: Բնականաբար մասնագետների ուշադրության կենտրոնում են  օլիմպիականները: Բայց Հայաստանի  ծանրամարտի հավաքականի գլխավոր մարզիչ Փաշիկ Ալավերդյանը նաև հեռուն տանող նպատակներ է հետապնդում:

Ծաղկաձորում երեկ սկսված ուսումնամարզական հավաքում  խաղեր մեկնող մեր երեք ընտրյալների՝ Վարազդատ Լալայանի, Անդրանիկ Կարապետյանի և Գարիկ Կարապետյանի հետ մարզումներում ընդգրկված են նաև 21 –ամյա  Գոռ Սահակյանն ու Գևորգ Ղահրամանյանը:

-  Գլխավոր թիմի կազմի փոփոխությունը պետք է սահուն, աննկատ   լինի, - զրույցում ասաց անվանի մարզիչը: - Ծաղկաձորյան մարզումներում ընդգրկել ենք հերթափոխի կանգնածներից այդ երկյակին: Թիվը փոքր է, որպեսզի հնարավորիս կարողանանք գումար խնայել: Հունիսի 16 –ին կիջնենք Երևան ու Օլիմպավանում նոր երիտասարդների կհրավիրենք հավաքի: Ամեն բան արվում է այնպես, որ  Բահրեյնի Մանամա քաղաքում   դեկտեմբերին նախատեսված աշխարհի առաջնություն կարողանանք  ուղեկցել տասը ծանրորդի:  Փորձառուների կողքին  պետք է լինեն նաև երիտասարդները: Ինչ վերաբերում է Փարիզի ստուգատեսին , ասեմ, որ աշխարհի բոլոր մարզիչների պես , մենք նույնպես, պետք է կարողանանք  ցանկալի մարզավիճակով մեր հերկուլեսներին ներկայացնել օլիմպիական մրցաբեմ: