Ժնևում տեղի  է ունեցել առողջապահության համաշխարհային կազմակերպության  / ԱՀԿ / 77 –րդ վեհաժողովը: Միջոցառմանը մասնակցել  և ելույթ է ունեցել  նաև  միջազգային օլիմպիական կոմիտեի  / ՄՕԿ / նախագահ Թոմաս Բախը: Նա ընդգծել է   ՄՕԿ-ի և ԱՀԿ-ի միջև ամուր համագործակցությունը ու հայտնել է  իր  երախտագիտությունը ԱՀԿ-ին, մասնավորապես  գլխավոր տնօրեն դոկտոր Թեդրոս Գեբրեյեսուսին՝ COVID-19 համաճարակի ժամանակ  ցույց տված աջակցության համար:

«Համաճարակը հստակ ցույց տվեց, թե որքան կարևոր է սպորտը մարդու  ֆիզիկական և հոգեկան առողջության համար։ Սպորտը կարող է կյանքեր փրկել, - ասել է ՄՕԿ –ի  նախագահը։ - Համաճարակի ժամանակ մահացության ճնշող մեծամասնության պատճառ են հանդիսացել գիրությունը, սրտանոթային նախատրամադրվածությունը և այլն:  Չափազանցություն չի լինի ասել, որ առանց ԱՀԿ-ի  « Տոկիո-2020 »  ամառային  և « Պեկին-2022 »  ձմեռային օլիմպիական խաղերը անվտանգ չէին կայանա»:

Համաձայնագրի միջոցով ՄՕԿ-ը և ԱՀԿ-ն ցույց են տալիս իրենց համատեղ հանձնառությունը սպորտի միջոցով առողջ հասարակության խթանմանը:

Կողմերը երկարաձգել են իրենց համագործակցության համաձայնագիրը՝  մինչև 2025թ.  դեկտեմբերի վերջը: