Հայաստանի նետաձիգների համար մրցաշրջանի մեկնարկը հանդիսացավ  Գերմանիայի Էսսեն քաղաքում անցկացված Եվրոպայի առաջնությունը: Այն վարկանիշային էր և Փարիզի օլիմպիական խաղերին մասնակցելու իրավունք էին ստանում անհատական պայքարի երեք լավագույնները, իսկ թիմայինում`  առաջին տեղ գրավողը:

Մեր երկիրը ներկայացրել էր երեք մարզիկ: 98 մրցակիցների պայքարում  Անդրեյ Հովհաննիսյանը և Համլետ Պողոսյանը, մրցակարգի համաձայն, ճանաչվեցին 25 –րդը, իսկ Վասիլ Շահնազարյանը ՝ 49 –րդը:

Մերոնք  իրենց վատ չդրսևորեցին նաև թիմային մրցումներում: Կրակագիծ ելած 24 հավաքականների մեջ նրանք  զբաղեցրին 9 –րդ հորիզոնականը:

ՀՀ նետաձգության հավաքականի գլխավոր մարզիչ Բորիս Վասիլյանը մեզ հետ զրույցում ասաց, որ Թուրքիայի Անթալիա քաղաքում հունիսի 12 –ին կսկսվի ևս մեկ  միջազգային վարկանիշային  մրցաշար: Անհատականում Փարիզի ուղեգիր կստանան առաջին ությակ,  իսկ թիմայինում՝ հնգյակ մտնողները:

Հաջողության հասնելու հույսով մայիսի 22 –ին նշած եռյակը ուսումնամարզական հավաքի կմեկնի Բաթում: Վրաստանի այդ քաղաքից հայ  նշանառուները հունիսի 10 –ին կուղևորվեն մրցավայր ՝ Անթալիա: