Հայաստանի առաջնություն հիշեցրեց  մայրաքաղաքի հրաձգության մարզադպրոցում անցկացված անվանի մարզուհի Զինաիդա Սիմոնյանի՝ ավանդական  հուշամրցաշարը: Բոլոր առաջատար նշանառուները իրենց դիպուկությունը դրսևորեցին  կրակագծում: Այդ  փաստն արդեն վկայում է մեծագույն հարգանքն ու անմոռանալի հիշատակը մեր երկրի կանանց սպորտի խորհրդանիշ համարվող Զինաիդա Սիմոնյանի նկատմամբ:

Նա հրաձգություն մարզաձևի համաշխարհային ամենափայլուն աստղերից մեկն էր: Եղել է  Խորհրդային Միության 18-ակի, Եվրոպայի 16-ակի և աշխարհի բազմակի չեմպիոն,   սահմանել է ԽՍՀՄ, Եվրոպայի և  աշխարհի 56 ռեկորդ : 

ԽՍՀՄ սպորտի վաստակավոր վարպետ  է,   ԽՍՀՄ սպորտպետկոմի  ու  ՀՀ  ԿԳ նախարարության ոսկե մեդալակիր, արժանացել է  <<  Մովսես Խորենացի  >>  պարգևի, ՀԱՕԿ-ի գործկոմի անդամ էր:

Գործուն սպորտին  հրաժեշտ տալուց հետո դարձավ ՀՀ ԿԳ նախարարության մասնագիտացված մարզադպրոցի մարզիչ, ուսմասվար, ապա `  տնօրեն : Ավաղ, նա անժամանակ կնքեց իր մահկանացուն: Կարճատև  հիվանդությունից հետո,  2012թ. մարտի 23-ին, 62 տարեկան հասակում,  կյանքին հրաժեշտ տվեց երևանցի մեծանուն նշանառու Զինաիդա Սիմոնյանը :

Նրա համար առաջնայինը հայրենիքի պաշտպանությունն էր։ Մեծ հայրենասերը երջանիկ ապրելու լավագույն միջոցը համարում էր  երկրի անխոցելի պաշտպանությունը, մեր ազգային բանակը . . .   

Իր ելույթներում հորդորում էր պատանիներին, որ կրակել սովորեն, տիրապետեն զենքին, ունենան սուր աչք և չդողացող ձեռք։ Հաճախ էր  դիմում  հայ մայրերին, որ իրենց  զավակներին  մարզումների ուղեկցեն հրաձգարաններ։

Անդրադառնալով 13 –րդ ավանդական մրցումներին, ասենք, որ երևանցիների հետ կրակագծում իրենց դիպուկությունը որոշեցին նաև Գյումրու և Վանաձորի պատվիրակները:

Օդամղիչ  զենքով,  10 մետրից  60 կրակոցով լավագույններ ճանաչվեցին  հրացանակիրներ  Միհրան Գաբրիելյանը և  Մարիամ Միքայելյանը,  ատրճանակավարներ  Բենիկ Խլղաթյանը ու Էլմիրա Կարապետյանը, վազող թիրախում  (30+30 կրակոց) ՝ Գոռ Խաչատրյանը և Գոհար Հարությունյանը, իսկ վազող թիրախի խառը երկյակների մրցությունում (20+20 կրակոց) ամենաբարձր  արդյունքը գրանցեցին Հովհաննես Մարգարյանն ու Արուսյակ Գրիգորյանը: