ԱՅԼԸՆՏՐԱՆՔԱՅԻՆ ԽԱՂԵՐԸ ՎՏԱՆԳԱՎՈՐ ԵՆ
Արդարացի խաղի միջազգային կոմիտեն (CIFP), ՄՕԿ –ը և համաշխարհային հակադոպինգային գործակալությունը (WADA) դեմ են արտահայտվել դոպինգ օգտագործող մարզիկների համար այլընտրանքային օլիմպիական խաղերի հնարավոր անցկացմանը։
Ամերիկացի միլիարդատեր Փիթեր Թիլը ցանկանում է կազմակերպել և ֆինանսավորել այլընտրանքային օլիմպիական խաղեր՝ դոպինգ օգտագործող մարզիկների համար։
Ակնկալվում է, որ միջոցառումը կանցկացվի ամեն տարի։ Դրանք կներառեն հինգ մարզաձև. լող, մարմնամարզություն, ծանրամարտ, աթլետիկա և մարտարվեստ: Ընդ որում կարող են մասնակցել ոչ միայն ներկա և նախկին պրոֆեսիոնալ, այլ նաև սիրողական մարզիկները։
- Մենք համաձայն ենք ՄՕԿ-ի և WADA-ի հետ, որ նման միջոցառումները զուրկ կլինեն արդար խաղից և սպորտային վերաբերմունքից: Ավելին, դրանք աղետալի վտանգ են ներկայացնում հենց իրենց՝ մասնակիցների առողջության համար, - ասվում է CIFP-ի հայտարարության մեջ:
WADA-ն նաև նշել է, որ նման մրցումներին մասնակցելը կարող է հանգեցնել պատժամիջոցների և զգուշացրել է մարզիկներին ու նրանց աջակցողներին, որ ովքեր ցանկանում են հանդես գալ այդ խաղերում, վտանգի են ենթարկում իրենց և խախտում են հակադոպինգային կանոնները:
