Օլիմպավանում  տեղի ունեցավ Հայաստանի ազգային օլիմպիական կոմիտեի  գլխավոր  համաժողովի հերթական նիստը:

Բացման խոսքով  հանդես եկավ  ՀԱՕԿ –ի գլխավոր քարտուղար Հրաչյա Ռոստոմյանը: Նա  առաջարկեց  հոտընկայս հարգել ընթացիկ  տարում  կյանքին  հրաժեշտ տված մարզաշխարհի ականավոր ներկայացուցիչներ Ալբերտ Ազարյանի, Միքայել Իսպիրյանի, Բագրատ Բուռնազյանի և Նիկոլայ Ղազարյանի հիշատակը:

Գլխավոր քարտուղարը զեկուցեց  2023թ.  ՀԱՕԿ –ի կատարած աշխատանքների մասին, նշելով, որ  սպորտը համախմբման, միասնության, համերաշխության շարժիչ  ուժն է, համայն հայության միավորող ուժը:

ԿԳՄՍՆ –ի , հանրապետական մարզական ֆեդերացիաների և մարզական  համապատասխան մյուս կազմակերպությունների հետ լուրջ աշխատանքներ են տարվել ֆիզկուլտուրան երկրում մասսայականացնելու, սպորտը զարգացնելու  և օլիմպիական գաղափարները բնակչության շրջանում տարածելու ուղղությամբ:

Հիմնանորոգվել  ու  վերանորոգվել են  մի քանի մարզադպրոցներ՝ Սյունիքի և Տավուշի մարզերում, իսկ եկող տարի համանման աշխատանքներ կարվեն Շիրակում:

Երկրի բնակչության առողջությունը կոփելու, տուրիզմը և ակտիվ հանգիստը կազմակերպելու ու զարգացնելու նպատակով  ՀԱՕԿ –ը լուրջ ներդրումներ է կատարել Ծաղկաձորի  ճոպանուղու գործունեությունը բարելավելու, միջազգային չափանիշներին լիովին համապատասխանեցնելու ուղղությամբ:  Կառուցվել և ավարտական տեսքի են բերվել օժանդակ շինությունները  և արհեստական ձյուն  պատրաստող համակարգը: Սա շատ կարևոր է  Հայաստանի  լեռնադահուկորդների վարպետության առաջընթացի համար: Օրինակ, անցյալ տարի, ձյան պակասի  պատճառով, ճոպանուղին դահուկորդներին   ծառայել է ընդամենը 28 օր: Իսկ ահա արհեստական ձյան առկայության պարագայում ճոպանուղու  աշխատանքը, մրցաշրջանում   կերկարի  յոթ ամսով:

Վերը նշած մարզական կազմակերպությունների համատեղ աշխատանքների և  միասնական գործելու շնորհիվ, ավարտվող տարում,  հայոց մարզաշխարհի ներկայացուցիչները միջազգային պաշտոնական մրցաշարերում   բարձր արդյունքների են հասել: 

Հրաչյա Ռոստոմյանը  խոսեց նաև Փարիզում  եկող տարի կայանալիք  33 –րդ ամառային  օլիմպիական խաղերին  մասնակցող Հայաստանի մարզիկների նախապատրաստական ընթացքի մասին:

Արդեն ունենք Փարիզի խաղերի մասնակցության  ուղեգիր նվաճած    յոթ մարզիկներ: Այդ թիվը երևի եռապատակվի, քանզի սպասելիքներ  դեռևս ունենք   ծանրորդներից, բռնցքամարտիկներից, աթլետներից, հրաձիգներից, մարմնամարզիկներից,  ջրացատկորդներից,  լողորդներից  . . .  

Մեր երկրի մարզական պատիվը պահող  ներկայացուցիչների հակադոպինգային կրթական և իրազեկման ծրագրերի իրականացման մասին զեկուցումով հանդես եկավ  հակադոպինգային գործակալության փոխտնօրեն , պրոֆեսոր Արեգ Հովհաննիսյանը: Նա մասնավորապես ասաց, որ արդեն մեկ տասնամյակ է,  ինչ իրենց  կազմակերպության հաստատման  և կայացման գործին   նեցուկ է լինում ՀԱՕԿ  -ի նախագահ Գագիկ Ծառուկյանը:

Իրականացվել են բազմաթիվ ծրագրեր , մեզանում կազմակերպվել են սեմինարներ, միջազգային համաժողովներ, նկարահանվել են  ֆիլմեր, կատարվել  է  դեղամիջոցների թվայնացման  բարդագույն աշխատանքը: Այդ ամենի շնորհիվ է, որ վերջին տարիներին Հայաստանի  որևէ  մարզիկ  չի որակազրկվել:

Հակադոպինգային կազմակերպությունը անելիքներ շատ ունի: Մինչ Փարիզի  օլիմպիական խաղերի մեկնարկը, առաջատար բոլոր վարպետները պարբերաբար կենթարկվեն դոպինգ ստուգումների:

Ուրախալի է  և այն փաստը, որ հայաստանյան կազմակերպության աշխատակազմից Գոհար Սահակյանը կլինի փարիզյան մարզահանդեսի դոպինգ սպաների  կազմում:  

Առաջարկություններով  հանդես  եկան ՀԱՕԿ –ի փոխնախագահ Արմեն Գրիգորյանը  և պատվավոր փոխնախագահ Դերենիկ Գաբրիելյանը:  

Տեղի ունեցավ նաև  մտքերի փոխանակություն, որին հաջորդեց պարգևատրության հաճելի արարողությունը:

Ֆիզիկական կուլտուրայի և սպորտի զարգացման, օլիմպիական գաղափարների տարածման գործում  ներդրած ծառայությունների համար  ՀԱՕԿ –ի շքանշանի արժանացավ   Երևանի օլիմպիական հերթափոխի պետական մարզական քոլեջի տնօրեն Վաղինակ Գալուստյանը:

ՀԱՕԿ –ի  << Տրդատ երրորդ  Արշակունի >>  մեդալով պարգևատրվեց Հայաստանի  ըմբշամարտի  ֆեդերացիայի նախագահ Ռոբերտ Խաչատրյանը, իսկ ՀԱՕԿ –ի  << Վարազդատ Արշակունի >>  մեդալով՝ Հայաստանի բռնցքամարտի ֆեդերացիայի նախագահ Հովհաննես Հովսեփյանը:

Եզրափակիչ խոսքով հանդես եկավ  Հրաչյա  Ռոստոմյանը: Շնորհավորելով  գործընկերներին, նա հավելեց, որ  ծրագրեր շատ կան, որոնք պետք է իրականացնել օլիմպիական տարում: Պետք է  միասնական աշխատանքը շարունակել: Կարևորվում է  համագործակցությունը  փորձառու մասնագետների, անվանի վետերանների հետ , նպատակով, որպեսզի մեր պատվիրակությունը հաջողության հասնի Փարիզի ստուգատեսում և խաղերից պարզճակատ վերադառնա հայրենիք: 

Հրաչյա Ռոստոմյանը իր խոսքը ավարտեց ամանորյա շնորհավորանքով: