Աթլետիկայի համաշխարհային ասոցիացիայի (World Athletics) ղեկավար, բրիտանացի Սեբաստիան Կոուն  վերընտրվել է իր պաշտոնում ՝  նախագահական  չորս տարվա ժամկետով: Հունգարիայում կայացած համաժողովում նա նախագահի միակ թեկնածուն է եղել:

Բրիտանացի 66 –ամյա Կոուն  Մոսկվայի /1980թ. /  և Լոս Անջելեսի / 1984թ./  խաղերի օլիմպիական չեմպիոն է՝  1500 մ վազքատարածությունում և կրկնակի արծաթե մեդալակիր ՝  800 մ վազքում: Նա նաև  Եվրոպայի չեմպիոն է  /1986թ./: 

Կոուն քաղաքական և  սպորտային գործիչ է, Բրիտանական կայսրության շքանշանի ասպետ,  Անգլիայի խորհրդարանի անդամ էր ՝ 1992-1997 թթ. :

Ասոցիացիայի փոխնախագահներ են դարձել  Սիմենա Ռեստրեպոն / Կոլումբիա /, Ռաուլ Չապադոն / Իսպանիա /, Ադիլ Սումարիվալլան / Հնդկաստան / և  Ջեքսոն Թուուեյը / Քենիա /։ 

Կազմակերպությունում 22 տարի աշխատելուց հետո ուկրաինացի Սերգեյ Բուբկան հրաժարական է տվել փոխնախագահի պաշտոնից։ 

Հեռակապով ճեպազրույց ունեցանք մարզաձևի հանրապետական ֆեդերացիայի նախագահ, հեռացատկում Եվրոպայի անփոփոխ ռեկորդակիր, գյումրեցի Ռոբերտ Էմմիյանի հետ: Նա նույնպես քվեարկել է իր վաղեմի բարեկամ Սեբաստիան Կոուի օգտին: Կոուն, ինչպես նաև Եվրոպայի աթլետիկայի ֆեդերացիայի նախագահ, բուլղարացի Դոբրոմիր Կարամարինովը ցանկություն են հայտնել ներկա լինել Արտաշատի վերակառուցված աթլետիկական մարզադաշտի բացման արարողությանը: Ի դեպ, Հունգարիայում, աթլետիկայի աշխարհի առաջնության ծրագրով օգոստոսի 19 - ին 1500մ. վազքում հանդես կգա մեր երկրի ներկայացուցիչ, գյումրեցի Երվանդ Մկրտչյանը: