Ժամանակակից օլիմպիական խաղերը նախկինում  չունեին պաշտոնական ծրագիր:  Մարզիկները և նույնիսկ թիմերը կազմավորվում էին   խաղադաշտում:  

Պատկերը փոխվեց 1924թ.:   Փարիզի  ամառային մարզահանդեսի համար կառուցված առաջին օլիմպիական գյուղում ձևավորվեց նոր կարգ: Մարզիկների մեծ մասն արդեն ապրում էր փոքր փայտե խրճիթներում՝ Փարիզին հարակից  օլիմպիական մարզակառույցներից  քիչ հեռու:

Ժամանակավոր  այդ կացարանները գործնականում ապրելու  հարմարավետ վայր էին մարզիկների համար: Փաստորեն մասնակիցները   հավաքվել  են մեկ հարկի տակ: Գործել է  փոստային բաժանմունք, տարադրամի փոխանակման, սննդի, բուժսպասարկման կետեր և այլն:

1924թ. Փարիզի օիմպիական խաղերի կազմկոմիտեի գլխավոր քարտուղար Ֆրանց Ռայխելը  պաշտոնական զեկույցում նշել է, որ ստուգատեսը համախմբում է երիտասարդներին, նրանց սովորեցնում  ավելի լավ ճանաչել և հարգալից վերաբերվել միմյանց նկատմամբ:

Անցած հարյուրամյակի ընթացքում մարզիկների  ավանը  ավելի մեծ դեր է ստանձնել օլիմպիական շարժումը միավորելու  գործում: Այժմ անհնար է պատկերացնել  համաշխարհային սպորտի մեծ մարզահանդեսն առանց  այդ կարևոր կառույցի:

Օլիմպիական գյուղը  մոլորակի վրա, հավանաբար, միակ տեղն է,  երբ բազմաթիվ  երկրների ներկայացուցիչներ միավորվում են մեկ վայրում ու յուրաքանչյուրը կյանքի յուրահատուկ փորձ  է ձեռք բերում:

<< Փարիզ – 2024 >> -ի և << Փարիզ – 1924 >> -ի հիմնական տարբերություններից մեկն այն է, որ օլիմպիական ավանն այժմ կառուցված է ապագայի հեռանկարով: Նպատակն այլևս ոչ թե մարզիկներին մի քանի շաբաթով տեղավորելն է,  այլ կայունություն ստեղծելն է, որը օգուտ կբերի տեղի բնակիչներին: 

Ֆրանսիացիների  կարծիքով օլիմպիական ավանը առաջին հերթին քաղաքաշինություն է, մանավանդ որ մարդիկ կապահովվեն  բնակարաններով:

2024թ. օլիմպիական ավանը պաշտոնապես իր դռները կբացի  եկող ամռանը: