Փետրվարի 9 –ին նշվում է վոլեյբոլի ծննդյան օրը:

Ամերիկայում է  հայտնվել  ամենադիտարժան խաղային մարզաձևերից մեկը։ 1895թ. ԱՄՆ Մասաչուսեթս նահանգի Հոլյոկ քաղաքում, երիտասարդ քրիստոնյաների ասոցիացիայի մարզադահլիճում,  ֆիզկուլտուրայի ուսուցիչ Ուիլյամ Մորգանը հանդես է եկել  նոր գնդակախաղով։

Մորգանը որոշեց  միաձուլել բասկետբոլի, բեյսբոլի և հանդբոլի տարրերը: Թենիսից վերցրեց ցանց և այն տեղադրեց հատակից 196 սմ բարձրության վրա: Ցանցն այդ ժամանակ միջին հասակ ունեցող մարդու գլխից բարձր էր: Խաղի էությունը գնդակը ցանցի վրայով նետելն էր։ 

1896թ. նոր խաղը Սպրինգֆիլդ քաղաքում ցուցադրվեց հանդիսականերին: Հանդիպմանը ներկա գտնված պրոֆեսոր Ալֆրեդ Խոլստեդի առաջարկությամբ այն անվանվեց վոլեյբոլ,  անգլերեն` « թռչող գնդակ» :

Այսօր մոլորակի յուրաքանչյուր յոթերորդ մարդ ( բնակչության 15%-ը ) ինչ-որ կերպ կապված է վոլեյբոլի հետ։ 

Վոլեյբոլը միակ թիմային խաղն է, որտեղ արդյունքն է  հաշվվում, ոչ թե ժամանակը, ուստի հանդիպումը կարող է շատ երկար տևել: 

Ամենաթանկ վոլեյբոլի գնդակն  արժե 18 հազար դոլար։ Բայց դա խաղային գնդակ չէ: Նման գին է որոշվել Ուիլսոնի գնդակի համար, որով հայտնի « Վտարվածը » ֆիլմի հերոսը հայտնվել է ամայի կղզում։ 

Խորհուրդ է տրվում  դասական վոլեյբոլ խաղալ  25°C  աստիճանում: 

1947թ. ստեղծված միջազգային ֆեդերացիան (FIVB) միավորում է 220 երկիր:  1948 թ. տեղի է ունեցել Եվրոպայի, իսկ մեկ տարի անց ՝  տղամարդկանց և կանանց աշխարհի առաջնությունները: Օլիմպիական ծրագրում ընդգրկվել է 1964թ.:

Հայաստանի անդրանիկ առաջնությունը  կայացել է 1925թ.: 1928թ. ստեղծվել է վոլեյբոլի հանրապետական առաջին սեկցիան, որը 1958թ. վերանվանվել է ֆեդերացիա:

1949թ. մեր երկրում մարզաձևով զբաղվել է  14.880, իսկ 1984թ.՝   68.000 մարդ: Այժմ այդ թիվը երևի թե հաշվվում է ընդամենը հարյուրներով:

Թվերը վկայում են, որ քանակը հիրավի նպաստում է վարպետության աճին: Մեզանում  եղել են տասնյակ շնորհալի վարպետներ, ովքեր համալրել են համամիութենական տարբեր հանրապետությունների և քաղաքների լավագույն թիմերը և մասնակցել են ԽՍՀՄ առաջնություններին: Հայաստանի կանանց և տղամարդկանց  համակազմերը նույնպես հանդես են եկել միութենական ստուգատեսներում:

Բոլոր ժամանակների մեր լավագույն խաղացող է ճանաչվել երևանցի Նինա Մուրադյանը: Նա ԽՍՀՄ կանանց հավաքականի կազմում եղել է օլիմպիական խաղերի փոխչեմպիոն / 1976թ. Մոնրեալ /: Մարզուհին նաև ԽՍՀՄ, Եվրոպայի, աշխարհի առաջնությունների բազմակի չեմպիոն և մրցանակակիր է:

Տղամարդկանցից անգերազանացելի է մնում  էջմիածինցի Սերոբ Փլավչյանը, որը համամիութենական ընտրանու կազմում   դարձել է Եվրոպայի ոսկե դափնեկիր:

Տոնի առթիվ շնորհավորում ենք վոլեյբոլ խաղացող բոլոր մարզիկ – մարզուհիներին, ՀՀ ֆեդերացիային և իհարկե գործող մարզիչներին և իրենց կյանքը մարզաձևին նվիրած երախտավորներին: