Շնորհավորում ենք Հայաստանի մարզասերներին՝ Մալթայում անցկացված  Եվրոպայի փոքր երկրների տղամարդկանց բասկետբոլի առաջնությունում մեր ազգայինի տոնած հաղթանակի առթիվ: Հայ  մարզասերներն  իրենց հերթին, վստահ ենք, որ գոհ ու շնորհակալ են մեր թիմի բոլոր խաղացողներին ու մարզիչներին՝ խաղարկված չեմպիոնական մեդալներն ու մրցանակները Հայաստան բերելու համար:

Նախնական փուլերում  Ջիբրալթարի / 100 : 63 /,  Սան Մարինոյի   / 78 : 66 /, կիսաեզրափակիչում՝  Անդորայի / 93 : 66 / ընտրանիներին հաղթելուց հետո, մեր գուլիվերները մտան եզրափակիչ  և չեմպիոնության համար  << ճակատամարտեցին >>  տանտերերի ՝ Մալթայի ներկայացուցիչների դեմ:

Մեկնարկային հինգ րոպեները հուզեցին մեզ, քանզի 14 միավորի դիմաց, լուսատախտակի վրա, մերոնց հաշվին չէր ջնջվում  0 թիվը: Այդ ժամանակ  գլխավոր մարզիչ Ռեքս Քալամյանը ընդմիջում վերցրեց, համապատասխան ցուցումներ տվեց և վերսկսված խաղի սկզբից ևեթ նախաձեռնությունն անցավ  հյուրերի կողմը:  

Առաջին քառորդում մրցակիցները ընդմիջման  գնացին տանտերերի ՝ ընդամենր չորս միավորի առավելությամբ / 19 : 15 /: Հաջորդ երեք քառորդները ավարտվեցին մեր թիմի հաղթանակով, որը  16 միավորի առավելությամբ ավարտեց հանդիպումը ՝   84 : 68:

Մալթացիների նկատմամբ համոզիչ հաղթանակը դիրքային հարձակումների, ասել է թէ՝  տակտիկական – թիմային գործողությունների և խաղացողների անհատական վարպետության ապացույցն էր:

Հաճույք պատճառեց ամերիկյան բասկետբոլում <<  մկրտված  >> Ջոնս – Մկրտչյան երկյակի հմտությունը: Միավորներ վաստակելուց բացի, նրանք ազատ գոտի էին ստեղծում, որպեսզի թիմակիցները  հեռահար, արդյունավետ նետումներ կատարեն:

Ընդհանրապես մերոնց խաղը վեհացնող էր, մանավանդ որ կարողանում էին հաջողությամբ վնասազերծել տանտերերի 220 սմ –ից բարձր հասակ ունեցող փորձառու կենտրոնականին: Հապա Քալամյանի վերցրած ընդմիջումները, որոնցից յուրաքանչյուրը նոր անակնկալ էր մալթացիների  համար:

Հաղթական հաշիվը հավանաբար ավելի մեծ լիներ, եթե վերջին րոպենեներին, որպես վերջնակորդ, Քալամյանը ասպարեզ չհաներ պահեստայիններին:

Փառահեղ նվաճում, որը բասկետբոլի հայկական դպրոցին լավ ապագայի, նոր հաջողությունների հույս է ներշնչում:

Հարկ է ասել, որ առաջնության մասնակից թիմերի խորհրդանշական հնգյակում տեղ ունեցան մեր Քրիս Ջոնսը և Անդրե Սպայտ Մկրտչյանը:

Եզրափակիչում  մեր թիմի օգտին 41 միավոր գրանցած Ջոնսը ճանաչվեց նաև առաջնության լավագույն խաղացող:

Ընդհանրապես  անուրանալի է Հայաստանի բասկետբոլի ֆեդերացիայի աշխատակազմի և, իհարկե, կազմակերպության նախագահ, գիտությունների թեկնածու, միջազգային կարգի մրցավար, մոտ անցյալի  նշանավոր վարպետ Հրաչյա Ռոստոմյանի դերը:

Սկսած 2015 թվականից,  Եվրոպայի առաջնություններում,  մեր թիմերը նվաճել են վեց ոսկե և երկու արծաթե մեդալներ:

Եվրոպայի փոքր երկրների առաջնությունում տղամարդկանց հավաքականը առաջին անգամ չեմպիոն է դարձել  դեռևս 2016թ.: Մեկ անգամ հաղթող է ճանաչվել մինչև 16 տարեկան պատանիների հավաքականը, իսկ ֆեդերացիայի փոխնախագահ, մեր նախկին լավագույն  << սնայպեր >>  Վահագն Հարությունյանի գլխավորած կանանց թիմերը նվաճել են երեք ոսկե և երկու արծաթե պարգևներ:

Ասածը վկայում է, որ  նպատակային աշխատանքի պարագայում, մերոնք  հաջողության կարող են հասնել ինչպես մենապայքարային, այնպես էլ ՝ խաղային մարզաձևերում: Վկա՝ հայկական բասկետբոլի հարուստ ավանդույթները: