Հայաստանը բարի լուր ստացավ Նորվեգիայի մայրաքաղաք Օսլոյում ընթացող ազատ ըմբշամարտի աշխարհի առաջնությունից:

Հրաշալի հաղթանակներով իր մրցելույթները սկսեց մեր չորս տղաներից առաջինը մրցագորգ ելած Արսեն Հարությունյանը / 61  Կգ /: Նա նախնական փուլերում  մեծ առավելությամբ հաղթանակներ տոնեց համապատասխանաբար ղազախստանցի, մինչև 23 տարեկանների աշխարհի չեմպիոն Ադլան Ասկարովի / 18 : 10 /, բահրեյնցի,   աշխարհի երիտասարդների բրոնզե մեդալակիր, Ալիբեգ Ալիբեգովի / 8 : 2 / նկատմամբ և մտավ  կիսաեզրափակիչ:

Խոսուն հաղթանակներն ըստ էության  թուլացրին Արսենի զգոնությունը, որից անմիջապես օգտվեց  ամերիկացի Դաթոն Դուեյն Ֆիքսը: Պայքարի սկզբից ևեթ  Ֆիքսը անակնկալ գրոհով գետնեց մեր վարպետին, ապա ակնթարթորեն կատարեց գլորումների շարք, որին հաջորդեց գոտեմարտի ավարտը ազդարարող հրահանգը:

Ցավալի պարտությունից  ապատիայի մատնված  Արսենը գլուխն առել էր ափերի մեջ, իսկ անակնկալ հաղթանակից ոգևորված մրցակիցը ուրախությունից հրճվում էր: 34 վայրկյան և 0 : 10 հաշվով պարտություն: Այդ առիթով բոլորս ափսոսեցինք:

Թվում էր, թե ձախողումից  իրեն կորցրած կլինի մեր մարզիկը: Բայց նա  հավաքվեց, գիտակցեց , որ ինքը թույլ վարպետ չէ և կամային բարձր որակներ, անկորտրում կամք դրսևորելու և  իր հնարքների  հարուստ զինանոցը օգտագործելու պարագայում,  կարող է հաղթել միլիարդանոց բնակչություն ունեցող Հնդկաստանի պատվիրակ  Ռավինդեր Ռավինդերին:

Եվ Արսենը իրենն արեց. 10 : 0 հաշվով իր օգտին ժամանակից շուտ հաղթանակ գրանցեց ու կանգնեց պատվանդանի <<  բրոնզե >> աստիճանին:   

Ի դեպ, ամերիկացի Ֆիքսը ոսկու համար պայքարում պարտվեց Ռուսաստանի պատվիրակին:

Հաջողության առթիվ շնորհավորում ենք ընթացիկ մրցաշրջանի Եվրոպայի չեմպիոն և արդեն աշխարհի բրոնզե մեդալակիր, 21  -ամյա Արսեն Հարությունյանին:

Հայ մարզասերը մեդալ էր ակնկալում նաև մեր մեկ այլ առաջատար վարպետ Վազգեն Թևանյանից / 65 կգ /: Ավաղ , այս անգամ նա ձեռնունայն կվերադառնա հայրենիք:

Այսօր  պայքարի կբռնվեն մեր ևս երկու ըմբիշներ: Արման Ավագյանը / 79 կգ / կգոտեմարտի բրոնզե մեդալի համար, իսկ  Արման Անդրիասյանի / 70 կգ /  համար կտրվի աշխարհի առաջնության մեկնարկը: