Անթիվ -  անհամար են հրաձգուհի Երջանիկ Ավետիսյանի տարած հաղթանակները, անքան շատ , որ, օրինակ չի հիշում թե քանի անգամ է դարձել աշխարհի գավաթակիր: Էլ չասենք աշխարհի , Եվրոպայի առաջնություններում նրա նվաճած բազմաթիվ  ոսկե մեդալների մասին: Նա ստենդային հրաձգությունում իրեն այնպես է զգում , ինչպես ձուկը ՝ ջրում:

        - Աշխարհի բոլոր հրաձգարաններն են ինձ հարազատ, - զրույցի ժամանակ ասաց մեծագույն նշանառուն: - Երևի նրանից է, որ ամենուրեք հաջողակ եմ եղել:

        - Գուցե հավելենք, որ ձեր սերն անափ  է մարզաձևի ՝  թռչող ափսեի նկատմամբ:

         - Ճիշտ նկատեցիք: Նախկինում մեր մրցաձևը կոչվում էր  << թռչող ափսե >>, իսկ այժմ՝ <<  ստենդային >>: Ի դեպ, արցախյան վերջին պատերազմը, որը ցավալի ավարտ ունեցավ, ապացուցեց  իմ մարզաձևի կարևորությունը: Դատեցեք ինքներդ: Ափսեանետից արագությամբ օդ թռչող ափսեին պիտի վայրկյանների ընթացքում հասցնես դիպուկ կրակոցով ջարդել: Ռոման Հովհաննիսյան անունով մի մարդ ականատես դարձավ իմ պարապմունքներին: Զգացի, որ հրապուրվել է: Մարզիչ  ամուսինս ՝ Գոռ Բարսեղյանը, նրան հրացան,  մի քանի խորհուրդ տվեց ու նա սկսեց  օդ կրակել: Անցան ամիսներ: Արցախյան երկրորդ պատերազմի ավարտից հետո իմացանք, որ նա ափսեից հազարապատիկ մեծ  չափերի  ԱԹՍ- ներ  է խոցել:

Հիմա Հայաստանում ստենդային հրաձգության միայն մեկ օջախ կա: Այն գտնվում է Արտաշատի  Այգեզարդ գյուղում, կառուցվել է մեր ընտանիքի միջոցներով : Ամեն բան համապատասխանում է միջազգային չափանիշներին: Մեր տեղը գիտե միայն Իրանի ֆեդերացիան: Այդ երկրի հավաքականը քանիցս ուսումնամարզական հավաք է անցկացրել մեզ մոտ, հիացել հրաձգարանով, օժանդակ հարմարություններով, հյուրանոցային համարներով  . . .  Եթե հատկացվեն մարզչական հաստիքներ,ապա ինչպես ԽՍՀՄ տարիներին   էր , մարզվողների հօծ խմբեր կունենանք  ու  մեր բանակին խիստ անհրաժեշտ հրաձիգ զինվորներ կպատրաստենք:

          - Հայտնի է , որ Գոռ Բարսեղյանը վաստակավորի եռակի կոչում ունի:Նա Հայաստանի , Խորհրդային Միության և Ռուսաստանի Դաշնության վաստակավոր մարզիչ է: Հետաքրքիր է մասնագետ   ամուսինը  խանգարում, թե օգնում է իր տիկնոջը:

           -  Անվանս համապատասխան՝  երջանիկ եմ,որ նման մասնագետի ղեկավարությամբ եմ պարապում: Մարզական երկարակեցության համար հենց Գոռին եմ պարտական:Նա միջազգային ճանաչում  ունի և մեծ հեղինակություն է վայելում գործընկերների շրջանում:

Աշխարհի գավաթի խաղարկության եզրափակիչ փուլերից մեկում  հյուրանոցից անտրամադիր մեկնեցի հրաձգարան: Դա չվրիպեց արդեն այնտեղ գտնվող  ամուսնուս աչքից: Նա ժպտաց ինձ ու բառացիորեն հետևյալն ասաց. << Այս պահին քեզ պարուրել է նախամեկնարկային տենդը: Դա լավ է, որովհետև քիչ անց  լիովին կսթափվես և կրակագիծ կելնես մարտական տրամադրությամբ: Ավելին, այսօր  նաև ռեկորդ ես սահմանելու  >>: Իսկապես,  100 կրակոցից փշրեցի 99 ափսե և մեր ոգևորությունը փոխանցվեց մրցաշարի ընթացքին հետևող բազմահազար մարզասերներին: Անմոռանալի օր էր:

            - Ասում են առաջիկայում միջազգային  մրցաշարի եք մասնակցելու:

            - Այո, Կահիրե ՝ աշխարհի գավաթի խաղարկություն եմ մեկնելու փետրվարի 20 –ին: Նպատակ ունեմ լավ հանդես գալ, դառնալ  Տոկիոյի  խաղերի մասնակից: Մարզաձևում խաղարկվող բոլոր  բարձունքները նվաճել եմ, բայց պակասում է օլիմպիական մեդալը: