Ծանրամարտի միջազգային ֆեդերացիայի  / IWF /  ղեկավարությունը ստեղծել է բարեփոխումների և կառավարման հանձնաժողով, որը պատասխանատու կլինի կազմակերպության նոր կանոնադրության մշակման համար: Այս մասին հայտնում է IWF- ի մամուլի ծառայությունը: 

Հանձնաժողովի նախագահ է ընտրվել ավստրալացի Դարեն Չարլզ Քեյնը, ով լողի միջազգային ֆեդերացիայի  / FINA /  իրավաբանական հանձնաժողովի անդամ է: 

Նախատեսվում է, որ բոլոր անհրաժեշտ փաստաթղթերը կմշակվեն մինչև 2021թ․  հունվարի 22-ը: Դրանք պետք է ուղարկվեն IWF- ի անդամ ֆեդերացիաներին՝  ընտրական բարեփոխումների համագումարից երկու ամիս առաջ։ Համաժողովը նախատեսված է 2021թ․ մարտի 24-ին: 

Հանձնաժողովի կազմում  ընդգրկվել է նախկին մարզուհի, Պանամայի օլիմպիական կոմիտեի իրավախորհրդատու Դամարիս Իցել Յանգ Արանդան, 400 մ  վազքի օլիմպիական բրոնզե մեդալակիր, աթլետիկայի միջազգային  ասոցիացիայի փոխնախագահ, կոլումբիացի Հիմենա Ռեստրեպոն: Հանձնաժողովի  խորհրդատու է նշանակվել  ամառային օլիմպիական միջազգային ֆեդերացիաների ասոցիացիայի  / ASOIF /   ներկայացուցիչ Ջեյմս Կարրը։

Ավելի վաղ միջազգային օլիմպիական կոմիտեն  / ՄՕԿ / քննարկել էր ծանրամարտը Փարիզում  2024 թ. կայանալիք  օլիմպիական խաղերի ծրագրից հանելու հնարավորությունը և մտահոգություն էր հայտնել  ֆեդերացիայի կանոնադրության բարեփոխման բացակայության կապակցությամբ: