Սպորտային մարմնամարզության տղամարդկանց մեր երկրի հավաքականը սկսել է նոր մրցաշրջանի նախապատրաստական աշխատանքների առաջին փուլը: Այն անցկացվում է Ալբերտ Ազարյանի անվան մասնագիտացված մարզադպրոցում: Գլխավոր մարզիչ Հակոբ Սերոբյանի ղեկավարած  մարզչական խումբը, նախապես կազմած ծրագրով, նպատակ ունի բարելավել մարմնամարզիկների ընդհանուր ֆիզիկական պատրաստականությունը: Յուրաքանչյուր մարզիկի հետ անհատական աշխատանք է տարվում,քանզի մարզիչները լավ գիտեն սաների ֆիզիկական որակների ուժեղ և թույլ կողմերը: Երկրորդ փուլում մեծ տեղ կհատկացվի մասնագիտական ` հատուկ պատրաստականությանը: Հասկանալի է, որ տղաները հիմնականում ժամանակ կտրամադրեն գործիքների վրա մարզվելուն:

Արդյունավետության աստիճանը կորոշի փետրվարի 25 – 28 –ը մայրաքաղաքում անցկացվելիք հանրապետական առաջնությունը: Հայտնի կդառնան առաջատարները, որոնցով կազմվելիք տղամարդկանց և կանանց հավաքականները հավաքի կմեկնեն Թբիլիսի: Կհաջորդի Դոհայում անցկացվելիք / մարտի 16 – 22 –ը / աշխարհի գավաթի խաղարկությունը: Ի դեպ,  աշխարհի գավաթի խաղարկությունների /2018 – 2020թթ / և աշխարհի ու Եվրոպայի առաջնությունների  / 2019 – 2020թթ. / արդյունքներով մարմնամարզության միջազգային ֆեդերացիան կորոշի Տոկիոյի օլիմպիական խաղերի մասնակիցներին: Նրանց թվում կլինեն նաև մեր երկրի պատվիրակները, բայց թե քանիսը `  առայժմ հայտնի չէ: Պարզ է, սակայն , որ մեր մարզիկների  համար մեծ խոչընդոտ են Բաքվում անցյալ  տարի անցկացված աշխարհի գավաթի խաղարկությունը  և առաջիկա մայիսի 27 – 31 –ը կայանալիք Եվրոպայի օլիմպիական վարկանիշային առաջնությունը, որոնցում  հայտնի պատճառնեով չեն հանդես գալիս մեր պատվիրակները: Հաստատ է այն, որ շնորհալի  բազմամարտիկ Արթուր Դավթյանն  իր համար Տոկիոյի խաղեր տանող ճանապարհը հարթել է  դեռևս նախորդ մրցաշրջանում`  աշխարհի շտուտգարդյան առաջնությունում, որտեղից նա հայրենիք վերադարձավ  օլիմպիական ուղեգրով: