Փաշիկ Ալավերդյան. Հայաստանի առաջնության արդյունքները կարող եք համեմատել Եվրոպայում գրանցվելիք արդյունքների հետ
Ծանրամարտի Հայաստանի առաջնության ավարտից հետո գլխավոր մարզիչ եւ ֆեդերացիայի գլխավոր քարտուղար Փաշիկ Ալավերդյանը ՀԱՕԿ լրատվականին ասաց.
«Ինչպես մտածում էինք, այդպես էլ եղավ: Ծանրորդների համար դեռ շատ շուտ է լավագույն մարզավիճակի գագաթին լինելը, եւ ես նրանցից նման բան չեմ պահանջում: Պաշտոնական առաջնություններին երիտասարդները դեռ չորս ամիս ունեն, մեծահասակները՝ յոթ ամիս: Բայց եթե այս առաջնությունում արձանագրված արդյունքները համեմատեք այն արդյունքների հետ, որոնք կգրանցվեն մոտ մեկ ամիս հետո Եվրոպայի առաջնությունում, կտեսնեք, որ առնվազն չորս քաշային կարգերում դրանք մրցանակային տեղերի արդյունք են: Ավելին, մեր ծանրորդներն այդ չորս քաշային կարգերում իրենց կիլոգրամները կարող էին ավելացնել եւս հինգով ու պայքարել առաջին տեղի համար: Ընդ որում, ասածս վերաբերում է նաեւ կանանց»:
Մարզիչը խոսեց նաեւ Անդրանիկ Կարապետյանի ձախողման եւ Ռուբեն Ալեքսանյանի չմասնակցելու մասին.
«Անդրանիկը պոկեց 165 կգ: Նա մարզումների ժամանակ էլ, չգիտես ինչու, խուսափում էր հրում վարժությունից: Այս առումով մենք նրա հետ աշխատանքի խնդիրներ ունենք: Եթե Անդրանիկը կարողացավ մեզ հետ աշխատել, մենք էլ կաշխատենք նրա հետ: Եվ հակառակը:
Ինչ վերաբերում է Ռուբեն Ալքեսանյանին, նա թեթեւ վնասվածք ուներ, դրա համար որոշում կայացվեց, որպեսզի չմասնակցի: Հույս ունենք, որ նա աշխարհի առաջնությանը պատրաստ կլինի եւ կմասնակցի: Մենք այսօր փոխարինողների պակաս չունենք մեծահասակներից մինչեւ պատանիներ: Մենք չենք կարող անարդյունավետ վատնել ՀԱՕԿ նախագահ Գագիկ Ծառուկյանի ցուցաբերած աջակցությունները, սկսած $ 50 հազար տուգանքից, որ մուծեցինք միջազգային ֆեդերացիային, վերջացրած թոշակներով, որ տալիս է ծանրորդներին», - ասաց մասնագետը:
