Հոկտեմբերի 28-ին Հերսոնեսում (Կրետե կղզի) մեկնարկում է շախմատի տղամարդկանց եւ կանանց Եվրոպայի թիմային առաջնությունը: Հունաստան մեկնելուց առաջ Հայաստանի տղամարդկանց հավաքականի գլխավոր մարզիչ Արշակ Պետրոսյանը զրուցեց ՀԱՕԿ լրատվականի հետ.

«Թիմը լավ տրամադրվածություն ունի, տղաները շատ են ուզում հաջող հանդես գալ Եվրոպայի առաջնությունում: Մրցաշարից առաջ հոկտեմբերի 14-ից 24-ը հավաք ենք անցկացրել Ծաղկաձորում: Մարզական գործընթացը բաղկացած էր ֆիզիկական եւ զուտ շախմատային մասերից: Օրվա առաջին կեսին տղաները, ըստ անհատական նախասիրությունների զբաղվում էին սպորտով, իսկ ճաշից հետո անցնում էինք շախմատին: Հավաքից գոհ եմ»,-ասաց Արշակ Պետրոսյանը:

Հավաքականի կորիզը կազմում են փորձառու շախմատիստներ Լեւոն Արոնյանը, Գաբրիել Սարգսյանը, Սերգեյ Մովսեսյանը եւ Հրանտ Մելքումյանը: Նրանք մեկ թիմային առաջնություն չէ, որ անցկացրել են: Հայաստանի չեմպիոն Հովհաննես Գաբուզյանն առաջին անգամ ներառված է հավաքականի կազմում: Մարզչի խոսքով, Հովհաննեսը լավ շախմատիստ է եւ անհրաժեշտության դեպքում կարող է օգնել թիմին: Մրցաշարի ընթացքը ցույց կտա, թե նա որքանով ակտիվ ներգրավված կլինի խաղում:

Ծաղկաձորում, տղամարդկանց հավաքին զուգահեռ, գլխավոր մարզիչ Արթուր Չիբուխչյանի ղեկավարությամբ, պատրաստվում էր նաեւ կանանց հավաքականը, որի կազմում են Էլինա Դանիելյանը, Լիլիթ Մկրտչյանը, Լիլիթ Գալոյանը, Մարիա Կուրսովան եւ Մարիա Գեւորգյանը: Մարզչի խոսքով, աղջիկները մարտական են տրամադրված, բայց մրցաշարից առաջ կանխատեսումներն անելն իմաստ չունի:

Հայաստանի տղամարդկանց հավաքականը Եվրոպայի առաջնությունում հաղթել է 1999 թվականին՝ Բաթումում, 2007 եւ 2015 թվականներին դարձել է արծաթե, իսկ 1997-ին՝ բրոնզե մեդալակիր:

Կանանց ընտրանին Եվրոպայի թիմային չեմպիոնի տիտղոսը նվաճել է 2003-ին՝ Պլովդիվում (Բուլղարիա), իսկ 2007-ին ճանաչվել է բրոնզե մեդալակիր: