Հայաստանից արտերկիր մեկնած ընտանիքների  շատ զավակներ զբաղվում են  սպորտով: Հաջողության հասնող մարզիկ – մարզուհիները սիրով հանդես են գալիս Հայաստանի դրոշի ներքո և համալրում  մեր հավաքականները:

Նրանցից  մեկն է 15 –ամյա Մարիա Ալեքսանյանը:  Օրերս նա դարձավ ձիասպորտի համառուսական բաց մրցաշարի կրկնակի մրցանակակիր: 90սմ. բարձրությամբ արգելքների հաղթահարում մրցաձևում ճանաչվեց երրորդը: Հաջորդ ՝ մեկ մետր բարձրություն ունեցող  պատնեշը դեռատի նժույգավարուհին ավելի հմուտ և հստակ << ցատկեց >> , գրավեց երկրորդ տեղը և պարգևատրվեց արծաթե մեդալով:  

Մարիայի մասին տեղեկացանք  ձիասպորտի համապետական ֆեդերացիայի գլխավոր քարտուղար, մոտ անցյալի մեր նշանավոր վարպետ Նորայր Ստեփանյանից: Ասաց , որ մարզուհին ինը տարեկանից պարապում է աշխարհի նախկին չեմպիոնուհի Անաստասիա Շչերբակովայի գլխավորությամբ:

Նորայրը մտերիմ է Մարիայի հայրիկի ՝ գործարար Հակոբ Ալեքսանյանի հետ: Ծնողները ամեն բան անում են , որ Հայաստանի դրոշի պատիվը պաշտպանող իրենց դուստրը հաջողություններ գրանցի հայրենիքի օգտին ու դառնա մեր առաջատար մարզիկներից մեկը:

Մոսկվաբնակ այդ ընտանիքը  նպատակ ունի  ապագայում վերադառնալ Երևան: