Փարիզում, 2024թ.  նախատեսված  ամառային օլիմպիական խաղերի բացման արարողությունը  տեղի կունենա Սենա գետի վրա և ափերին: Այս մասին կազմկոմիտեն հետևյալ ուղերձն է հղել.  << Միջոցառումը օլիմպիական խաղերի պատմության մեջ ամենադիտարժան և հասանելի բացման արարողությունը կլինի,  բաց`  բոլորի համար, բաց`  ձեր առջև>>:

Մարզահանդեսի մեկնարկը կտրվի հուլիսի 26-ին։ Բացման արարողությունն առաջին անգամ կանցկացվի ոչ թե մարզադաշտում, այլ գետի ափին,  հենց գետի վրա։ Նախատեսվում է  կազմակերպել 160 նավակների շքերթ, որոնք կտեղափոխեն մասնակից երկրների պատվիրակություններին:

Շքերթի երթուղու երկարությունը  վեց կմ է: Գետի  ափերին կտեղադրվեն հսկայական 80 հեռուստաէկրաններ:

Արարողությանը, որը կտևի ավելի քան երեք ժամ,  ներկա կլինեն  շուրջ 600 հազար հանդիսականներ:  Նրանք  միջոցառմանը կհետևեն կամուրջների վրայից  և գետի ափերից։ Ափամերձ ստորին գոտիներում  կտեղադրվեն ժամանակավոր տրիբունաներ:

33 –րդ ամառային օլիմպիական մարզահանդեսը  Ֆրանսիայի մայրաքաղաքում  կանցկացվի  հուլիսի 26-ից օգոստոսի 11-ը: Փարիզը  խաղերն ընդունելու է  երրորդ անգամ.  1900թ., 1924թ.  և մեկ դար հետո ՝ 2024թ. :