Տևական դադարից հետո բացօթյա մարզումները վերսկսել են հեծանվորդները։ Խոսքը վերաբերում  է խճուղայիններին, որոնք  անգործության չեն մատնվել։

Անբարենպաստ եղանակների ժամանակ գլխավոր մարզիչ Արմեն Գյոզալյանի և նրա օգնականների ղեկավարությամբ << երկաթե նժույգի հեծյալները >> օգտվել են հիմնականում հեծանվադազգահներից, կատարել ընդհանուր և հատուկ ֆիզպատրաստականության որակները բարելավող վարժություններ։

Մարզումների նորմալ պայմաններին վերադառնալու՝  պարետատան ընձեռած հնարավորությունը մեծ ոգևորություն առաջացրեց։ Մարզիկները վերստին սկսեցին երթևեկել մայրաքաղաքից տարբեր մարզեր տանող ճանապարհներով։ Անիվների խմբային երթը և դրա հարուցած մեղմ, մի տեսակ անտրտունջ  հառաչը, նոր լիցք հարուցեց << ճանապարհների ուրվականներին>>, որոնք անհոգնում պտտում են հեծանիվների ոտնակները։

Մասնագետները տակտիկական առաջադրանքներ են տալիս, բացատրում այս կամ այն խնդրի կարևորությունը, խոսում, օրինակ,  փաստում են արագությունը և ժամանակը մեկտեղելու նշանակությունը հաջողության հասնելու գործում և այլն։

Ավելորդ չէ նշել , որ վնասվածքից լիովին ապաքինվել է  Եվրոպայի չեմպիոն Էդգար Ստեփանյանը և նա  նույնպես ներգրավված  է պարապմունքներում։