Հայաստանի տղամարդկանց և կանանց ծանրամարտի  հավաքականներն ավարտեցին երևանյան ուսումնամարզական հավաքը և  մարզումները   վաղվանից կշարունակեն  Աբովյանի մարզահամալիրում: Այնտեղ 10 օր պարապելուց հետո կվերադառնան մայրաքաղաք` մասնակցելու  պետական  օլիմպիական մարզական քոլեջում անցկացվելիք ՀՀ առաջնությանը: Այնուհետև  առաջատար շուրջ 20 մարզիկ –մարզուհիներ կընդգրկվեն  ծաղկաձորյան հավաքում, որը կավարտվի մարտի 10 -ին: Պարապմունքներն այնուհետև կշարունակվեն Երևանում: Կհաջորդի հավաքականի ուղևորությունը Բաթում՝ մասնակցելու   ապրիլի 5 –ին   մեկնարկող Եվրոպայի առաջնությանը, որտեղ մարզիկները ձեռք կբերեն  օլիմպիական վարկանիշային միավորներ:

      -  Նպատակ ունենք տղամարդկանց հավաքականը լրիվ կազմով  ներկայացնել եվրոպական ստուգատես:  Ուզում ենք տեսնել Հայաստանի մարզիկների մրցելույթները, ծանրութեթև անել, գնահատել նրանց գործողությունները, - ասաց հավաքականի գլխավոր մարզիչ Փաշիկ Ալավերդյանը: -  Հնարավոր է նոր, շնորհալի տղաներով համալրվի մեր թիմը: Կարծում եմ, ինչպես Երևանում էր,  ճիշտ կօգտագործենք  նաև Եվրոպայի առաջնությանը  նախորդող պարապմունքները: Խոսեմ նաև կանանց հավաքականից, որտեղ սերնդափոխություն է տեղի ունենում: Ըստ  էության 3 – 4 մարզուհի կուղեկցենք Եվրոպայի առաջնություն:

ՀԱՕԿ լրատվական բաժին